Шымкентте Ұлттық домбыра күні қарсаңында №6 қалалық перзентханада 22 нәресте дүние есігін ашты. Айтулы мерекемен қатар келген қуанышқа орай Шымкент қалалық аналар кеңесінің бастамасымен шақалақтарға арнайы естелік сыйлықтар табысталды. Сәби үні мен күй күмбірі астасқан бұл күн жаңа босанған аналар үшін ұмытылмас мерекеге айналды.
Республика көлемінде ұйымдастырылған «Айналайын» акциясы аясында Шымкент қалалық аналар кеңесінің бастамасымен №6 перзентханада ерекше шара өтті. 5 шілде күні алғаш дүние есігін ашқан сәбиге қасиетті қара домбыра сыйға тартылып, барлық аналардың иығына ақ жаулық жабылды. Сондай-ақ, арнайы сыйлықтар табысталып, ақжарма тілектер айтылды. Дәл осы күні нәрестесін құшағына алған аналардың бірі – Аякөз Ерман. Ол шаңырағына үшінші сәбиін әкеліп, қуанышқа кенелді. Айрықша мерекеде ана атанған ол өзіне көрсетілген құрметке ризашылығын білдіріп, ақжарма алғысын жеткізді.
Ал перзентхана төрінде күмбірлеген күй ойнап, аналардың қуанышын еселей түсті. Астана күні қарсаңында ана атанған жандарға құрмет көрсетілді. Ақ халаттылардың мәліметінше, қазіргі таңда барлық аналар мен нәрестелердің жағдайы жақсы.
Дәрігерлердің мәліметінше, жыл басынан бері №6 перзентханада 4 мыңға жуық нәресте дүниеге келген. Медициналық мекеме 2020 жылы күрделі жөндеуден өтіп, бүгінде ана мен балаға сапалы қызмет көрсететін жетекші перзентханалардың бірі саналады.
