Шаһарда өңірдің өндірістік әлеуетін арттыруға бағытталған тағы екі ірі зауыт іске қосылды. Қала әкімінің қатысуымен аккумуляторларды кәдеге жарату және қайта өңдеу зауыты мен алюминий профильдерін өндіретін жаңа өндіріс орнының тұсауы кесілді. Бұл бастамалар отандық өндірістің көкжиегін кеңейтіп, ел игілігіне қызмет ететін жаңа мүмкіндіктерге жол ашпақ. 
«Жұлдыз» индустриялық аймағында орналасқан «Шымкент аккумуляторларды кәдеге жарату зауытының» салтанатты ашылу рәсімі өтті.
Аталған инвестициялық жоба пайдаланылған аккумуляторларды экологиялық тұрғыдан қауіпсіз түрде кәдеге жаратуға және қайта өңдеуге арналған заманауи өндірістік жүйені қалыптастыруды көздейді. Бұл бастама қауіпті қалдықтардың қоршаған ортаға тигізетін зиянын азайтып, қайта өңделген шикізатты өндірісте қайта пайдалануға мүмкіндік береді. Жобаның жалпы инвестиция көлемі 2 миллиард теңгені құрайды. Кәсіпорын үшін 2,3 гектар жер телімі бөлінген. Келесі кезекте қала әкімі Ғабит Сыздықбеков алюминий профильдерін өндіретін жаңа зауыттың ашылу рәсіміне қатысып, өндіріс барысымен танысты.
Инвестициялық жоба өңдеу өнеркәсібін дамытуға және отандық өнімнің үлесін арттыруға бағытталған. Кәсіпорын толық қуатына шыққанда 80 адам тұрақты жұмыспен қамтылып, жылына 3,8 мың тонна алюминий профильдерін өндіретін болады.
Жаңа кәсіпорындардың іске қосылуы Шымкенттің өнеркәсіптік әлеуетін арттыруға серпін береді. Мұндай жобалар импортты алмастыруға, отандық өндірісті дамытуға және жаңа жұмыс орындарын құруға мүмкіндік береді.
