АҚЖАЙЫҚТА ЖАҢА ҮЙЛЕР ЕЛ ИГІЛІГІНЕ БЕРІЛДІ

Үшінші мегаполисте баспана бақытына бөленгендердің қатары тағы артты. Салтанатты жиында 19 жастағы қала тұрғыны жаңа пәтерге ие болды. Қала әкімінің орынбасары қатысқан рәсімде 50 отбасыға көптен күткен баспаналарының кілті табысталды. Ақжайық шағын ауданында бой көтерген жаңа тұрғын үй барлық қажетті инфрақұрылыммен қамтамасыз етілген.

        Шаһарда тұрғындарды қолжетімді баспанамен қамту жұмыстары қарқынды жалғасуда. Тұрғын үй кезегінде тұрған және жеңілдетілген несие бағдарламаларына қатысқан тағы 50 отбасы жаңа пәтерге қол жеткізді. Қазіргі таңда Ақжайық шағын ауданында 498 отбасы жаңа пәтерге көшіп, қоныс той тойлап үлгерген. Салтанатты кілт табыстау рәсіміне қала әкімінің орынбасары Берік Беркімбаев қатысып, тұрғындарды құттықтады. «2-10-20» және «5-10-20» бағдарламалары аясында берілген бұл баспаналар – мемлекеттік қолдаудың нәтижесі.

Жаңа қоныс иелерінің қатарында көпбалалы отбасылар, ерекше бала тәрбиелеп отырған жандар, мүмкіндігі шектеулі азаматтар және толық емес отбасылар бар. 19 жастағы Аида Ертайқызы да жаңа пәтердің иесі атанды. Жас қыз үшін бұл – үлкен өмірге жасалған сенімді қадам. Қуанышты сәтте оны қолдап, әжесі арнайы келіп, ақ тілегін арнады. Үй кезегінде ұзақ уақыт тұрған азаматтар жаңа баспанаға қол жеткізіп, ерекше қуанышқа бөленді. Олар қала басшылығына алғыстарын білдіріп, баспаналы болғандарына шынайы ризашылығын жеткізді.

Мемлекеттік бағдарламаларды кезең-кезеңімен жүзеге асыру тұрғын үй кезегінде тұрған азаматтар санын азайтуға мүмкіндік береді. Бұл өз кезегінде қала тұрғындарының өмір сапасын арттыруға ықпал етуде. Қолжетімді ипотека жүйесі арқылы баспаналы болу мүмкіндігі жыл сайын кеңейіп келеді.