Шымкентте татар-башқұрт халқының дәстүрлі «Сабантой – 2026» мерекесі атап өтілді. Тамыры тереңнен бастау алатын бұл мейрам – еңбекті құрметтеп, бірлік пен татулықты дәріптейтін мәдени шара. Мереке қарсаңында халықтардың салт-дәстүрлері насихатталып, ән мен би, ұлттық ойындар мен қолөнер көрмелері көпшілік назарына ұсынылады.
Мерекелік бағдарлама аясында қонақтарды салтанатты қарсы алу рәсімі ұйымдастырылып, қазақтың ұлы ақыны Абай Құнанбайұлының ескерткішіне гүл шоқтары қойылды. Аталған шараға Қазақстан татарлары мен башқұрттарының республикалық конгресі, Шымкент қаласының ішкі саясат басқармасы, «Қоғамдық келісім» мекемесі және этномәдени бірлестік өкілдері қатысты. Сондай-ақ Сабантойда қазақ, татар, башқұрт және өзге этнос өкілдерінің шығармашылық ұжымдары өнер көрсетті. Сахнада ұлттық әндер шырқалып, мың бұралған билер көпшілікке көтеріңкі көңіл күй сыйлады.
Дәстүрлі Сабантойда татар башқұрт халқының ұлттық құндылықтарын дәріптеген кең көлемді көрмелер көпшілік назарына ұсынылды. Атап айтқанда, қолданбалы өнер туындылары, тарихи фотокөрме, ұлттық тағамдар жәрмеңкесі және татар халық ертегілеріне арналған сурет көрмесі келушілердің ерекше қызығушылығын тудырды.
