Ж.Шанин театры 97-ші маусымның шымылдығын түрді. Сахна құдіретін жанымен сезініп, театр өнерін биікке көтерген әртістер өткен маусымда ауыз толтырып айтарлық жетістікке жеткен. Айтулы күні қазақ театрының тұңғыш режиссері Жұмат Шаниннің «Арқалық батыр» пьесасы негізінде жарық көрген кітаптың тұсаукесері өтті.
Маусымашар салтанаты қызыл кілеммен басталып, театр тарландары мен жас буын әртістер сахна төріне көтерілді. Жұмат Шанин атындағы Шымкент қалалық академиялық қазақ драма театрының кезекті маусымашары театр өнерінің биік деңгейін, классикалық мұраларға деген құрмет пен заманауи көзқарасты айқындаған, жетістіктерді саралаған маңызды мәдени оқиға болды. Жаңа маусым қазақ театр өнерінің негізін қалаған көрнекті тұлға Жұмат Шаниннің есімін ұлықтауға арналған мазмұнды шарамен басталды. Маусымашар аясында өнер майталманының шығармашылығын насихаттау мақсатында өзі жазған «Арқалық батыр» пьесасы негізінде жарық көрген кітаптың тұсаукесері өтті.
Аталған еңбекті жазушы, журналист Қайрат Сәбитұлы кітап етіп құрастырып, орыс тіліне аударған. 1924 жылы Семей театрында алғаш сахналанған бұл пьеса қазақ драматургиясының дамуына зор үлес қосқан тарихи туынды саналады.
Жаңа маусым көрермендерге арналып сахналанған Сәбит Мұқановтың «Мөлдір махаббат» драмасымен ашылды. Осы орайда театр және кино әртісі, ҚР мәдениет қайраткері Еркінбек Шымырқұлов маусымашармен құттықтап, өнердегі әріптестеріне шығармашылық табыс тіледі.
Сахна саңлақтарының еңбегі мен шабытынан туған әр қойылым – рухани азық, ұлттық мәдениеттің айнасы. 97-ші маусымын жаңа леппен бастаған Шанин театры алдағы уақытта да көрерменін көркем туындыларымен қуантуды, қазақ театр өнерінің мәртебесін асқақтатуды мақсат етеді.
