Шымкент қалалық қуыршақ театры 42-маусымын бастады. Театрдың басты мақсаты — қойылымдар арқылы балалар мен жасөспірімдерге рухани тәрбие беру. Жаңа маусымды жаңа лебпен бастаған театр мерекелік ашылу салтанатын Ыбырай Алтынсариннің «Қарға мен түлкі» ертегісімен бастады. Театр ғимараты ішінде көрермендерді түрлі ертегі кейіпкерлері күтіп алып, кішкентай бүлдіршіндермен би биледі.
Театр — заманауи адам үшін өнердің қызық түрінің бірі болумен қатар, қуаныш, жеңілдік және жақсы көңіл күй сезімін тудыратын жағымды эмоциялардың үлкен ортасы. Бүгінде қоғамда стресске жиі душар болатын адамдар көптеп кездеседі. Айналадағы мәселелер мен жұмыстағы түйіткілдер жүйкені жұқартып, миды шаршатады. Осындай жағдайда жүрген адам соңында өз эмоциясынан аулаққа кете алмайды. Ал бұл жағдайдан рухани толысу арқылы арылатын адамдар, депрессиядан театрға бару арқылы айыға алады. Түрлі қойылымдар қоғамдағы үлкен адамдарға ғана емес, кішкентай буынға да арнап қойылады. Өмірдің әр кезеңін балаға сан алуан кейіпкерді сөйлету арқылы түсіндіретін театр ұжымы тәрбие мен адамдықтың бастау бұлағы іспеттес.
Театр ұжымы ұлттық құндылықтарды ұлықтап, өнерсүйгіш ұрпағымызды тәрбиелеу жолында еңбек етіп келеді. Мұнда құрылғалы 500-ден астам қуыршақ жасалып, жалпы репертуарда қойылым саны 172-ні құрайды. 41 маусымда алыс жақын шет елдерде гастрольде болған ұжым, жаңа маусымда да іссапарларды жалғастыру жоспарланып отыр дейді. Театр өткен маусымда «Шымкенттен шашу» гастрольдік тур аясында Қазақстан қалалары мен Өзбекстан Республикасының Ташкент, Самарқанд, Науай, Қашқадария, Ферғана, Бұхара, Әндіжан облыстары мен Қырғызстан Республикасы Ош қаласында болған. «Түркістанға тарту» гастрольдік іссапары аясында Түркістан облысының қалалары мен аудандарында өнер көрсеткен. Сондай-ақ, Солтүстік Македонияда өткен «СТОБИ -2023» Халықаралық антикалық драма фестивалінде «Ерекше шешімі үшін» сертификатымен және Тәжікстан Республикасындағы VII Халықаралық «Чодари хаел» қуыршақтар фестивалінде «Үздік қуыршақ спектаклі», «Театр көктемі — 2024» I қалалық театрлар фестивалінде «Көркем актерлік ансамбль үшін» номинацияларымен марапатталған. Қарағанды қаласында өткен Халықаралық «Кукляндия» Ашық фестиваліне қатысты. Кәсіптік қуыршақ өнері саласындағы халықаралық байланыстарды дамыту мақсатында Шымкент қаласында І Халықаралық «Puppetland» қуыршақ театрлары фестивалі ұйымдастырылып, фестивальге Қазақстанның 7 қаласының және 13 шетел мемлекеттерінің қуыршақ театрлары қатысты.
Жаңа маусымның ашылуына қаланың шығармашыл зиялы қауым өкілдері, балалар мен жастар қатысты. Жаңа маусым неміс жазушысы В.Гауффтың танымал шығармаларының бірі «Мұрынды ергежейлі» ертегісімен ашылды. Ертегінің мәні — сыртқы тартымдылықтан гөрі жан сұлулығы маңызды екенін, жақсылық әрқашан зұлымдықты жеңетінін көрсетеді. Бұл арқылы баланы адамдыққа тәрбиелейміз деген ұжым «қуыршаққа кейіпкеріміздің рөлін сіңдіріп, көрермендерге сол арқылы адамдық пен тәрбиені жеткізу біздің басқа театрлардан ерекшелігіміз»,-дейді
