Елбасы ұсынған «100 нақты қадам» Ұлт жоспарының 10-шы қадамы Есеп беретін мемлекетті қалыптастыру» бағытына арналған. Осыған сәйкес барлық денгейдегі әкімдердің халық алдындағы есеп беру кездесулері жалғасуда. Солардың бірі Шымкент қаласында жаңадан құрылған Қаратау ауданының әкімі Ғабит Мәуленқұлов кезекті есеп беру жиынын Асар шағынауданындағы №89- мектеп –лицейінде өтті.
Шымкент қаласының Қаратау ауданының аумағы 32 мың 256 гектарды құрайды. Құрамына 17 шағын аудан мен 13 тұрғын алабы қарайтын ауданның 213 мыңнан астам халқы бар. Қала аумағының жыл санап кеңеюіне байланысты жаңадан құрылған Қаратау ауданының әкімі Ғабит Мәуленқұлов өзінің екінші есеп беру кездесуін бұл жолы Асар шағын ауданындағы №89 мектеп-лицейінде өткізді. Жиынға ауданға қарасты бірқатар елді мекен тұрғындары, осы аумақтан сайланған мәслихат депутаттары және де Шымкент қаласы әкімінің орынбасары Бейсенбек Жанбосынов пен әкімдікке қарасты бөлім басшылары, сонымен бірге құқық қорғау органдарының қызметкерлері қатысты. Ал есепті баяндамасында атқарылған жұмыстарға жан-жақты тоқталған Ғабит Патшаханұлының айтуынша Қаратау ауданында өткен жылы жалпы ұзындығы 110 шақырымды құрайтын 82 көшені күрделі, орташа және қайта құру жұмыстарынан өткізуге тиісті қаржы қарлған. Нәтижесінде былтыр 66 көшедегі құрылыс жұмыстары аяқталса, қалған 16 көше 2017 жылға өтпелі нысандар қатарында.
Мұнан өзге аудан аудан аумағында 28 мың 399 тұрғын үй табиғи газбен қамтылған болса, қамтылмаған тұрғын үйлер саны 12 мыңнан асады. Осыған байланысты өткен жылы Таскен тұрғын алабы мен Мирас шағын ауданында газдандыру бағытындағы құрылыс жұмыстары аяқталса, бүгінде аталмыш елді мекен тұрғындарын көгілдір отынға қосу шаралары жүргізіліп келеді. Сонымен бірге былтыр Бозарық саяжайында табиғи газбен қамтуға 727 млн. тенге қаржы бағытталып, тиісті жұмыстардың аяқталу мерзімі 2017 жылға жоспарланған.
Ал мұнан соң есепті жиынға келген тұрғындар аудан әкіміне толғандырған мәселелерін айтып сауалдарын қойып жатты. Айта кету керек, бұл жерде көтерілген мәселелердің бірқатары елді мекендердегі тар көшелердің жайы мен аяқжолдарға қатысты болды. Сонымен бірге, тұрғындар әкімге айтқан ұсыныстары мен бірге атқарылған жұмыстарға да өз бағаларын беріп жатты.
Осылайша өрбіген жиын барысында қойылған сауалдардың басым бөлігі Қайнарбұлақ Бозарық саяжайы тұрғындарынан түсіп жатты. Яғни аталмыш аймақтарда тұратын ағайын көбіне көшелерді жарықтандыру балабақша тапшылығы, мектепке барар жолдардың жайы қоғамдық көліктер мәселесін көтерді.
Аудан тұрғындарынан келіп түскен сауалдардың басым бөлігі коммуналды салаларға қатысты болғандықтан кездесу соңында бұл бағыттар бойынша биылғы жылы атқарылатын жұмыстарға Шымкент қаласы әкімінің орынбасары Бейсенбек Жанбосынов тоқталып өтті. Есепті кездесу барысында аудан тұрғындарынан жазбаша түрде де әкімге 17 сауал 5 ұсыныс келіп түскен болатын. Ал бұған аудан әкімі жазбаша жауап берілетіндігін жеткізіп, екі сағатқа жуық уақытқа созылған жиынды қорытындылады. Бұл ретте тұрғындар әкімнің жылдық есебіне өздерінің оң бағаларын беріп тарқасты.
Абай Омар