Мұғалімдер күні – білім беру қызметкерлерінің кәсіби мерекесі – бірқатар посткеңестік елдерде қазан айының бірінші жексенбісінде тойланады. Көптеген елдердегі сияқты Қазақстанда да мұғалімдер күні оқу жылы басталғаннан кейін көп ұзамай күзде тойланады. Алда мұғалімдер мен олардың шәкірттерінің қажырлы еңбегінің айлары күтіп тұр. Кәсіби мереке өткен оқу маусымының қорытындысын шығарып, жаңа жетістіктерге қуат береді.
Ұстаз тек ілім-білім үйрететін адам емес, руханият пен имандылықтың алып жүрушісі. Ұстаздар ерекше азаматтық миссияны – жас ұрпақты тәрбиелеуді атқарады. Олардың білімі мен тәжірибесі, дәстүр мен жаңашылдық сабақтастығы әр мектептің өзегінде. Барлық қоғамдық саланың одан әрі дамуы, мәдениет деңгейі мен халықаралық аренадағы орны елдегі білім деңгейіне байланысты. Мұғалім – прогресстің нағыз қозғалтқышы. Сондықтан ерте заманнан бері бұл кәсіптің адамдары құрметтеліп, ең дана болып саналады.
Шымкент қалалық “Опера және балет”театрында «Жарық нұры ғаламның» атты Ұстаздар күні қарсаңында мерекелік кеш өтті. Оған қала әкімі Мұрат Әйтенов қатысып, шәкірт тәрбиелеу жолында талмай еңбек еткен және білім саласына үлесін қосып жүрген мұғалімдерді салтанатты түрде марапаттады.
Ұлағатты ұрпақ тәрбиелеу – аса жауапты әрі күрделі міндет екенін айтқан шаһар басшысы әрбір ұстаз құрмет пен мемлекеттік наградаға лайықты екенін жеткізді.
-Сіздер балаларға өмір бойы өздерімен бірге алып жүретін, болашағын және шынайы өмір жолына қажетті баға жетпес байлық — білім бересіздер. Сонымен бірге, қаламыздың абыройын асқақтатып отырсыздар. Сіздердің арқаларыңызда Шымкент қаласының оқушылары халықаралық және республикалық пәндік білім сайыстарынан 10 алтын, 17 күміс, 33 қола жүлдені жеңіп алды. 200-ден астам оқушы жүлделі орындарды иеленді.
Сіздердің тынымсыз еңбектеріңіздің арқасында алда талай Елін сүйетін, білімді жас ортаға қосыларына кәміл сенеміз,-деді М.Әйтенов.
Білім беру саласы — қаладағы негізгі жүйе құраушы сала. 871 білім беру ұйымы 440 мыңға жуық тәрбиеленуші, оқушы мен студентті қамтиды. Бұл — әрбір үшінші шымкенттіктің осы жүйеге қатысы бар деген сөз.
Қызығы мен шыжығы қатар жүретін ұстаздық жолда өрлеу мен өсу тілеген қала әкімі М.Әйтенов салтанатты жағдайда ҚР Білім және ғылым министрлігінің «Еңбек ардагері» медалімен Бейсенбаева Шолпан Асылбекқызын, “Білім беру ісінің құрметті қызметкері” төсбелгісімен №28 жалпы орта білім беретін мектебінің директоры, ағылшын тілі пәні мұғалімі Құрманбекова Қарлығаш Жаркынбекқызын марапаттады.
Бірнеше ұстазға ҚР Оқу-ағарту министрлігінің “Құрмет Грамотасы” мен алғыс хаттар табысталды. Сонымен қатар әрбір ұстазға шаһар басшысының ықылас гүлі тарту етілді. Жалпы, мұғалімдер күні – маңызды мерекелердің бірі. Жылдан жылға педагогтар әр отбасының, бүкіл мемлекеттің игілігіне күш-қуатын беруде. Кәсіби мерекеде тағзым етіп, шексіз алғыс айту – білім нәрімен сусындап жүрген жандарға деген құрмет пен алғыс.
Салтанатты шара соңы концерттік бағдарламаға ұласты.
