Мемлекет басшысы жүктеген әлеуметтік міндеттер аясында балаларды қолдау шаралары жалғасуда. Шымкент қаласында 18 жасқа дейінгі мүгедектігі бар балаларға және ата-анасының қамқорлығынсыз қалған балаларға бір реттік әлеуметтік көмек көрсету жоспарланып отыр. Жоспарға сәйкес, бірінші санаттағы балаларға 5 айлық есептік көрсеткіш (АЕК), ал ата-анасының қамқорлығынсыз қалған балаларға 20 АЕК мөлшерінде төлем беріледі.
Мемлекет басшысы Қасым-Жомарт Тоқаев өз Жолдауларында әлеуметтік әділеттілікті қамтамасыз ету, халықтың әл-ауқатын арттыру және балалардың құқықтары мен мүдделерін қорғау мәселелеріне айрықша мән беріп келеді. Президент айқындаған әлеуметтік саясаттың негізгі бағыттарының бірі – азаматтарды қолдау шараларының атаулы әрі тиімді жүзеге асуын қамтамасыз ету. Осы тұрғыдан алғанда, балаларға әлеуметтік көмек көрсету олардың қажеттіліктерін ескеріп, отбасыларға қосымша қолдау білдірудің маңызды тетігі саналады.
Бастапқыда аталған көмекті 25 қазан – Республика күніне орай төлеу көзделген болатын. Алайда төлемді жүзеге асыру үшін тиісті нормативтік құқықтық актілерге өзгерістер енгізу қажеттілігі туындаған. Мәслихаттың таратылуына байланысты қажетті рәсімдердің аяқталмауы себепті әлеуметтік көмекті төлеу мерзімі кейінге шегеріліп отыр.
Тиісті шешім қабылданып, құжаттарды рәсімдеу жұмыстары аяқталғаннан кейін төлемді 2026 жылдың соңына дейін жүзеге асыру жоспарланған. Әлеуметтік көмектің нақты төлену мерзімі қосымша хабарланады.
Балаларды қорғау, олардың құқықтарын қамтамасыз ету және әлеуметтік қолдауға мұқтаж отбасыларға көмек көрсету – мемлекет саясатының басым бағыттарының бірі. Шымкентте жоспарланып отырған бұл төлем де аталған санаттағы балаларға қосымша қолдау көрсетуге бағытталған.
Осыған байланысты 18 жасқа дейінгі мүгедектігі бар балалардың ата-аналары мен ата-анасының қамқорлығынсыз қалған балалардың қорғаншыларынан төлем мерзімінің өзгеруіне түсіністікпен қарау сұралады.
