2022 жылғы 23 қыркүйекте Мәскеуде ТМД Экономикалық кеңесінің 95-ші отырысы өтті. Бұл – Қазақстан Республикасы төрағалық ететін жылы өтіп жатқан Достастық елдерінің жоғары органдарының үшінші отырысы, деп хабарлайды ҚР Сауда және интеграция министрлігінің баспасөз қызметі.
Тәуелсіз Мемлекеттер Достастығы Экономикалық кеңесінің төрағасы, Қазақстан Республикасы Премьер-Министрінің орынбасары – сауда және интеграция министрі Серік Жұманғариннің алғы сөзінің басты арқауы Достастық елдерінің нарықтарды азық-түлік тауарларымен қамтамасыз ету үшін ортақ өзара ынтымақтастығының қажеттілігі болды.
— Ұлттық экономикалық және азық-түлік қауіпсіздігі тұрғысынан біздің нарықтарымызды бірінші кезекте қажетті өнімдермен, ең алдымен, азық-түлік тауарларымен молықтыруға назар аудару қажет, — деп атап өтті Серік Жұманғарин. — Жеткізудегі мерзімді үзілістер көбінесе олардың шектеулі қолжетімділігіне, бағаның негізсіз өсуіне және тиісінше Достастық елдеріндегі инфляциялық қысымға әкеледі. Бірқалыпты, өзара тиімді сауда саясаты халықтың әл-ауқатының өсуіне ықпал етеді.
Бұл үшін мүмкіндіктер мен әлеует бар.
Экономикалық кеңес отырысының қарауына ұсынылған негізгі мәселелердің қатарында – қызмет көрсетудің, мекемелердің, қызметтердің инвестициялардың еркін саудасын жүзеге асыру туралы Келісім жобасы. Құжат сараптамалық деңгейде тұжырымдамалық түрде келісілді, қазіргі уақытта мүдделі тараптар нарыққа қол жеткізу бойынша міндеттемелерді айқындайтын Келісімге қосымшаларды, сондай-ақ әрбір мемлекетке нақты пайда әкелетін инвестициялар туралы бөлімді талқылауда. Осы Келісім Достастық елдерінің сауда-инвестициялық қызметін нығайту үшін қосымша мүмкіндіктер беруге арналған.
Күн тәртібінде ТМД-ға қатысушы мемлекеттердің 2030 жылға дейінгі кезеңге арналған инновациялық ынтымақтастығының мемлекетаралық бағдарламасын іске асыруға ерекше назар аударылды.
ТМД Экономикалық кеңесінің келесі отырысын 2022 жылдың 9 желтоқсанында Мәскеуде өткізу туралы шешім қабылданды.
