ТҰРАНДАҒЫ ТАПСЫРМАЛАР ОРЫНДАЛУДА

    Мегаполис статусын алған Шымкент төртінші жылдықтың бел ортасынан өтіп, көркейіп, көріктеніп келеді. Жолдар жаңартылып, даңғылдар салынып, абаттандыру жұмыстары үздіксіз жүргізілуде. Осы орайда миллионды қалаға инфрақұрылым жүйесі қандай қажет болса, көп қабатты тұрғын үй де керек болды. Бірнеше жыл бұрын Шымқаланың шеткі бөлігі саналатын жерлер бүгінде адам танымастай кейіпке енді. Шаһардың орталығына айналды. Бұл зәулім ғимараттар қала келбетін одан әрі аша түсуде. Қаламызда күн санап саны артып келе жатқан тұрғын үйлерді салу жұмыстары кең етек ала бастады. Нәтижелі жұмыстың да  кемшін тұстары болатыны жасырын емес. Тұран шағын ауданынан пайдалануға берілген тұрғын үйлердің сапасына қатысты тұрғындар тарапынан мәселе туындаған болатын. Қала басшысы Мұрат Әйтеновтің тапсырмасымен құрылған арнайы топ 151 пәтерде кемшіліктерді  анықтаған. Осы орайда шаһар басшысы тұрандықтармен кездесіп, тапсырмалардың орындалу барысын көрді.

   -Мәселелер шешімін табуда. Сабырлы болыңыздар. Инфрақұрылым және абаттандыру жұмыстары өз кезегімен жүргізіледі,-деп нақтылады Мұрат Дүйсенбекұлы.

  Мәселені назарға алып, шешу жолдарына кіріскен әкімдікке тұрғындар ризашылығын білдірді. Тұрандықтармен әңгімелесіп, өзге де мәселелерін назарға алғаннан кейін әкім инфрақұрылым, көгалдандыру, абаттандыру, жылыту қазандықтарын тексерді. Қазіргі таңда Тұран шағын ауданында 2020 жылдан бері 5576 пәтерлі 88 көпқабатты  үйдің құрылысы жүруде.