ШАҺАР СПОРТЫНЫҢ СЕРПІЛІСІ ҚАНДАЙ?

    Спортты серік еткен мегаполис халқын 50 пайызға жеткізу межесі қойылған. Бұл 2025 жылға дейінгі жоспар. Жауапты басқарма ағымдағы жылдың 6 айында ол көрсеткіштің 36,2%-ын орындапты. Әлемдік аренада көк байрағымызды көкке көтеретін саланың бүгінгі бет алысын баяндап, кемшіліктерін мысалмен келтірген шаһардың дене шынықтыру және спорт басқармасы басшысының сөзіне құлақ терейік.

    Шымкент қаласының бес жылдық даму жоспарына сай дене шынықтырумен айналысатын азаматтардың санын жалпы халықтың 50 пайызына дейін жеткізу, 1000 адамға арналған спорттық инфрақұрылыммен қамтамасыз ету сынды бірқатар индикатор межесі қойылған. Даму бағытының цифрлы санын сараптаған басқарма басшысы атқарылатын жұмыстармен де бөлісті.Соңғы жылдары бұқаралық спортты дамытуға қомақты қаржы бөлінуде. Қазына қаражаты нақты қай спорт түріне жұмсалып жатыр? Спорт индустриясының бүгінгі бет алысы болашақ чемпиондарды серпілте ме? Бауыржан Қалмұхамедұлы бұл мәселені де тасада қалдырмады.

     Мегаполисте мемлекеттің қолдауымен, кәсіпкерлердің ынта танытуының арқасында спорт нысандарының саны артқан. Нәтижесінде арт-спорт бағдарламасы бойынша ата-аналар баласын спорттық секцияларға бере бастаған.  Әлемдік сайыстарда Қазақстанның байрағын биікке көтерген чемпиондарға қолдау білдіру, сондай-ақ, жеңіске бір табан жақын қалған спортшыларды жігерлендіру шарасы да шетте қалмапты.

    2022 жылы шаһардың спортына серпін беретін ҚР чемпионаты, республикалық сайыс, халықаралық деңгейдегі жарыс, бұқаралық басқосу, жалпы саны 87 шара өткізілген.