Қаламызда 2 бірдей көше техникалық пайдалануға беріліп отыр. Көлік қозғалысына байланысты шаһардың басты магистралды көшелерінің бірі ретінде саналатын Д.Қонаев даңғылы мен Адырбеков көшелерінің белгілі аралығы қолданысқа берілді.
Ұзындығы 3,74 шақырымды құрайтын жол торабы Алдияров бағытынан бастап Т.Рысқұлов көшесіне дейінгі аралықты қамтиды. Жыл басында бекітілген жоспар бойынша ені 23 метр 4 жолақты жолдың екі бөлігінде ирригациялық жүйе мен абаттандыру жұмыстары, жаяу жүргіншілер жолы мен жарық шамдарды орнату көзделген. 2018-2020 жылдар аралығында Рысқұлов көшесінен бастау алып, Жандосов көшесіне дейінгі аралықты қамтитын 800 метр жолға қайта құру жұмыстары жасалған. Биылғы жылы Жібек жолынан бастап Тәуке хан даңғылына дейінгі аралықта құрылыс жұмыстары атқарылуда. Көше құрылысын жүзеге асыру «Базис- К» ЖШС тапсырылған. Адырбеков көшесін қайта құру жұмыстары ағымдағы 2023 жылы аяқталып, толығымен пайдалануға беру жоспарланып отыр.
Қала әкімі құрылысын бақылап, жұмыс барысын тексерістен өткізген екінші даңғыл — Қонаев көшесі. Құрылыс жобасы бойынша аталған даңғылдың 3 кезеңінде ұзындығы 561,2 метр, ені 42 метрді құрайтын жол салынуы тиіс. 2020 жылы басталған құрылыс жұмыстары нәтижесінде теміржол мен жерүсті жаяу жүргіншілері өткелі салынып, сапаны қадағалау мақсатында техникалық қадағалау жүргізіліп жатыр. Аталған жұмыстарды атқарып жатқан мердігер мекеме «Казахдорстрой». Қала тұрғындары мен қонақтары үшін маңызды даңғылға айналған жол торабына бөлінген қаржы 25 миллиардты құрап отыр.
