Конституциялық реформаға енгізілетін өзгерістерді түсіндіру — маңызды миссия. Өйткені, ол арқылы елдің болашағы таразыланады. Осы мақсатта бүгін Қазақстан Республикасы Парламенті Мәжілісінің депутаты, «AMANAT» партиясының мүшесі Қайнар Абасов, Түркістан облыстық мәслихатының депутаты Дулат Әбіш, «AMANAT» партиясының Ордабасы аудандық филиалының Атқарушы хатшысы Әлиасқар Бердімұрат, Ордабасы ауданы әкімінің орынбасары Азат Оралбаев Ордабасы ауданындағы “Бөрте Милка” сүт өндіру фирмасының қызметкерлерімен кездесті.
Өндірістің еңбек ұжымымен кездесуде Мәжіліс депутаты Конституцияның 33 бабына енетін өзгерістер туралы ақпарат беріп, 5-маусымда ел аумағында өтетін референдумға қатысуға шақырды.
«Мемлекет басшысы Қасым-Жомарт Тоқаев айтып өткендей еліміздегі табиғи қазба байлықтар мұнан бұрын республикадағы санаулы топтың қолында болған. Енді сол байлық халықтың меншігіне өтпек. Бір сөзбен айтқанда бұл реткі саяси реформа еліміздің еңсесін тіктеуге, халқымыздың әл-ауқатын көтеруге үлкен септігін тигізбек. Сондықтан елдің болашағына бей-жай қарамайтын азамат ретінде маусым айындағы саяси науқанға қатысады деп сенемін», — деді «Бөрте милка» ЖШС ұжымымен кездесуде.
Келелі кездесуде облыстық мәслихат депутаты Дулат Әбіш конституциядағы өзгерістер туралы өз ойын ортаға салып, референдум өткізудің мән-маңызына тоқталды.
— Айбынды Ата Заңымызды өзгерту жолында жұртшылықтың пікірі назарға алынатындығы — бұқараның көңілінен шығып жатқаны байқалады. Жаңа Қазақстанды құруға бет бұрған биліктің халықпен санасып, бірігіп жұмыс атқаруға шақыруы — ел азаматы ретінде жауапкершілік жүктейді. Мемлекеттің жарқын болашағы үшін жаңа бастамаларды қолдап, ешкімнің қалыс қалмауына шақырған таңдауда әр азаматтың пікірі маңызды,-деді.
«Бөрте милка» қызметкерлерімен басқосудан соң Ордабасы аудандық мәслихатында «Amanat» партиясы мүшелерімен конституциялық реформаларды түсіндіру бойынша басқосу өтіп, ауыл шаруашылығы саласындағы мәселелер бойынша Төрткүл ауылының халқымен кездесті.
Шаруалардың мұң-мұқтажын тыңдап, қордаланған мәселелерді Мәжіліс мінберінде салалық министрліктерге депутаттық сауал ретінде жолдайтындығын жеткізді.
