Ө.БАТЫРБЕКТІҢ ӨШПЕС ӨНЕРІ

Өнері өлмейтін, өнегесі ұрпаққа жалғасатын тұлғалар бар. Қазақтың ұлттық гобелен өнерінің негізін қалаушылардың бірі Батырбек Өтептің туғанына биыл 80 жыл. Осыған орай шебердің шығармашылығына арналған көрме ашылып, халықаралық ғылыми-тәжірибелік конференция өтті.
Көрме алаңына жиналған өнер жанашырлары шебердің қолынан шыққан туындыларды тамашалады. Әр жұмыста ұлттық нақыш пен өзіндік қолтаңба айқын көрінеді. Бұл – суретшінің өнерге сіңірген еңбегін ғана емес, қазақтың дәстүрлі гобелен өнерін дамытуға қосқан үлесін де танытатын мұра.

Батырбек Өтептің шығармашылық жолын жоғары бағалайтындардың бірі –шәкірті Қуандық Ералыұлы. Ол шебердің өнердегі орнын ерекше атап өтіп, оның еңбектері ұлттық мәдениет аясынан асып, әлемдік деңгейде танылуға лайық екенін жеткізді. Айтуынша, оның өнерге деген адалдығы мен өзіндік ізденісі кейінгі буынға үлгі.

Шебердің өмірі мен шығармашылық мұрасы конференция барысында да кеңінен талқыланды. Ғалымдар мен өнер өкілдері ұлттық гобеленнің қалыптасуы, дәстүр сабақтастығы және заманауи көркемдік ізденістер жөнінде ой бөлісті. Ал суретшінің өмірлік серігі оның өнерге деген ерекше ықыласын еске алып, шығармашылық әлемі мен тұлғалық болмысына тоқталды.

Шара аясында “Батырбек Өтеп. Өнерге адал ғұмыр” атты альбомның тұсауы кесілді. Басылымда суретшінің өмір жолы мен шығармашылық мұрасы жинақталған. Бұл еңбек – шебердің есімін ұлықтап қана қоймай, оның өнерін кейінгі ұрпаққа танытатын құнды дүние. Өйткені тұлғаның ғұмыры аяқталғанымен, өнері мен өнегесі уақыт өткен сайын жаңғырып, жалғасын табады.