Елімізде бірқатар дәрі-дәрмек бағасы төмендеп жатыр. Шілде айындағы мониторинг нәтижесі бойынша Қазақстанда 589 препарат арзандаған. Сондай-ақ, бір дәріханада қымбат көрінген дәрі, екіншісінде арзанырақ болуы мүмкін. Мұндай жағдайда азаматтар қайтпек? Тұтынушы өз құқығын қалай қорғайды?
Дәрінің бағасы – күнделікті сұранысқа ие тауарлардың бірі. Сондықтан оның құнының негізсіз өсуіне жол бермеу маңызды. Осы мақсатта фармацевтикалық нарықтағы баға тұрақты түрде бақыланады. Шілде айындағы мониторинг еліміздің 20 өңіріндегі 2 555 дәрілік заттың атауын қамтыған. Нәтижесінде 147 препарат бағасының төмендеуі тіркелген.
Ал бағаны бақылау қалай жүзеге асады? Қазір бұл жұмыстың басым бөлігі цифрлық жүйеге көшкен. Дәрілік заттарды таңбалау және қадағалау жүйесі препараттың қозғалысын бақылап қана қоймай, оның нақты сатылымдағы бағасын белгіленген шекті бағамен салыстыруға мүмкіндік береді.
Яғни дәріхана сөресіндегі баға да назардан тыс қалмайды. Ал тұтынушы өзіне қажетті ақпаратты өзі де тексере алады. Ол үшін Naqty Onim мобильді қосымшасы бар. Егер дәрінің бағасы белгіленген шектен жоғары екені анықталса, бұл туралы тиісті органдарға хабарлауға болады. Мұндай цифрлық бақылау – нарықтағы ашықтықты арттырып, дәрі-дәрмектің халыққа қолжетімді болуына бағытталған. Баға төмендеді ме, әлде шекті құннан асып кетті ме – енді оны тексерудің мүмкіндігі бар. Ең бастысы, тұтынушы өз құқығын біліп, дәрі бағасына қатысты ақпаратты ашық әрі жедел ала алады.
