35 ЖЫЛДАН КЕЙІНГІ ФУТБОЛШЫЛАРДЫҢ БАСҚОСУЫ

Шымкентте 35 жылдан кейін футбол ардагерлері қайта бас қосты. Шаһарда алғаш рет Қазақстан футболының мақтанышы, КСРО спорт шебері Евстафий Пехлеванидидің құрметіне жолдастық кездесу ұйымдастырылды. Орталық стадионда ұлттық құраманың ардагерлері мен Шымкент футболының саңлақтары жасыл алаңда қайта қауышты. Тарихи тұлғаның құрметіне ұйымдастырылған дода спортшыларды бір арнаға тоғыстырып, футбол тарихындағы жарқын сәттерді жаңғыртты.Жасыл алаңда қайта табысқан футбол саңлақтарының естелігі де, айтары да көп. Талай жыл бұрын бірге доп тепкен ардагерлер үшін бұл кездесу жастық шаққа қайта оралғандай әсер сыйлады. Евстафий Пехлеванидидің туған күніне орай ұйымдастырылған ойынның  мақсаты – футбол тарихында із қалдырған тұлғаның есімін ұлықтап, аға буынға құрмет көрсету. Спорт шеберінің  сөзінше бұл достық кездесу бір-бірімізбен жүздесіп, ортақ тарих пен сағынышты еске алу іспетті.Футбол ардагерлерінің басын қосқан бұл кездесу алдағы уақытта дәстүрге айналуы мүмкін. «Ордабасы» футбол клубының президентінің сөзінше  осындай шараларды тұрақты түрде өткізуді жоспарлап отырғанын жеткізді. Оның сөзінше, Шымкент пен Қазақстан футболының дамуына өлшеусіз үлес қосқан ардагерлердің еңбегін ұмытпау – маңызды міндет. Аға буынның жетістіктері мен жүріп өткен жолы жас футболшыларға үлгі болуы тиіс.

Стадионға жиналған жанкүйерлер де футбол ардагерлерінің ойынын ерекше ықыласпен тамашалады. Әсіресе, бұрынғы футболшылардың алаңға қайта шығып, шеберлігін көрсетуі көрерменге көтеріңкі көңіл күй сыйлады. Жанкүйерлер қатарында ел ағалары да бой көрсетіп, футбол ардагерлеріне қолдау білдірді. Әлем чемпионы Біржан Жақыповтың әкесі мен қала әкімінің әкесі Әбдімәжит Сыздықбеков жасыл алаңдағы саңлақтарды жастық шақтарының мақтанышы ретінде ерекше ықыласпен тамашалады. «Жастық шағымыздың Ямальдары бүгін футбол алаңында», – деп қуанышында жеткізді.

Тарихи кездесу футбол ардагерлерін қайта табыстырып, көрерменге сағыныш пен шаттыққа толы ерекше сәттер сыйлады. Жасыл алаңдағы бұл басқосу аға буынның жетістігін ұлықтап қана қоймай, футбол тарихын келер ұрпаққа жеткізудің жарқын үлгісіне айналды. Өйткені футболдың шежіресі – алаңда тер төккен саңлақтардың есімімен мәңгі жасайды.