МЕГАПОЛИСТЕГІ ОҢ ӨЗГЕРІСТЕР

Шымкентте атаулы әлеуметтік көмек алушылар саны 61 пайызға азайды. Бүгінде бұл қолдау 1 858 отбасындағы 9 597 тұрғынға тағайындалған. Аталған деректі баспасөз мәслихатында шаһардың әлеуметтік-экономикалық даму көрсеткіштерін баяндаған қала әкімінің орынбасыры Сәрсен Абайұлы мәлімдеді.

Жұмыс іздеп жүргендерге жақсы жаңалық! 22 қыркүйекте ауқымды бос жұмыс орындары жәрмеңкесі өтеді. Жалпы қалада еңбекпен қамту бағытында биыл 31 398 азаматты қолдау жоспарланған болатын. Бүгінде соның 25 390-ы нақты нәтижеге қол жеткізіп, жұмыспен қамтылды.

Сонымен қатар Шымкентте 200 орындық жаңа перинаталдық орталық бой көтеруде. Бұл маңызды жоба — шаһардағы қарқынды демографиялық өсіммен тікелей байланысты. Өйткені үшінші мегаполисте жыл сайын 30 мыңнан астам сәби дүниеге келеді.

Екі жыл бұрын құрылысы басталған Шымкенттегі жаңа стадион белгіленген мерзімде неге аяқталмады? Бұл туралы қала әкімінің орынбасары Сәрсен Құранбек брифинг барысында нысанның уақытында тапсырылмауына бірнеше фактор себеп болғанын айтты. Оның сөзінше, бастапқы мердігер — «Qazaq Stroy» компаниясы жұмысты белгіленген кестеге сай жүргізе алмаған. Осыған байланысты мердігер ауыстырылды. Қазір жобалық-сметалық құжаттаманы жаңа мердігерге өткізу рәсімі жүріп жатыр. Ал стадионның сыйымдылығын 35 мыңнан 60 мың орынға дейін ұлғайту қолға алынған.

Шымкентте автобус тапшылығына ешқандай негіз жоқ! Шаһарда күн сайын әлеуметтік маңызы бар 83 маршрут бойынша 14 тасымалдаушы компанияның 988 автобусы жолаушыларға қызмет көрсетеді. Бұл туралы қала әкімінің орынбасыры Сәрсен Абайұлы мәлімдеді. Сонымен қатар, қоғамдық көлікте жолақы төлеуден қашқан жолаушылар да назардан тыс қалған жоқ — ереже бұзғандар айыппұл арқалады.