Жедел жәрдем қызметкерлері адам өміріне араша түсеміз деп басын қауіп-қатерге тігеді. Абзал жандардың мәртебесі мен қауіпсіздігін қорғау мақсатында Шымкентте жасанды интеллектке негізделген смарт-видеожетондар іске қосылды. Енді қызметкер арнайы батырманы баспай-ақ, «Көмек!» немесе «SOS!» деп дауыстаған бойда жүйе автоматты түрде Полиция департаменті мен жедел жәрдемнің интеграциялық орталығына дабыл жібереді.
Бұл жүйе медицина қызметкерлерінің қауіпсіздігін күшейтіп қана қоймай, құқық бұзушылықтың алдын алуға мүмкіндік береді. Шымкент қаласының Денсаулық сақтау басқармасына қарасты медициналық ұйымдарда қауіпсіздік жүйесі кезең-кезеңімен күшейтілуде. Қазіргі таңда емдеу мекемелерінде жалпы саны 2722 бейнебақылау камерасы жұмыс істейді. Оның 689-ы сыртқы, 2033-і ішкі аумақтарды бақылайды. Камералар қабылдау бөлімдеріне, күту залдарына, дәліздерге және дәрігерлердің қабылдау кабинеттеріне орнатылған. Сонымен қатар жедел жәрдем қызметкерлері GPS жүйесімен жабдықталған смарт-бейнежетондарды пайдаланады. Осы арқылы қызметкердің орналасқан жері мен бригаданың қозғалысы онлайн бақыланады. Түсірілім барысында жедел жәрдем бригадасымен бірге шақырту түскен мекенжайға бардық. Әр секунд маңызды болатын сәтте медицина қызметкерлері науқасқа алғашқы көмекті кідіріссіз көрсетті. Ал олардың қауіпсіздігі заманауи технологиялардың көмегімен қамтамасыз етілген.
