Денсаулық сақтау саласының болашағын айқындайтын тың идеялар Shymkent Hub алаңында тоғысты. MedTechHackathon 2026 хакатонында өнертапқыштар медициналық кейстерге инновациялық шешімдер ұсынып, өз жобаларын сарапшылар алдында қорғады. Үздік бастамалар медицинаның цифрлық дамуына жаңа серпін бермек.
MedTechHackathon 2026 байқауы Шымкент қаласының Цифрландыру басқармасы мен Galamat Group компаниясының бірлескен бастамасымен ұйымдастырылды. Хакатонның басты мақсаты – медицина саласына арналған жаңа технологиялық шешімдер мен стартап жобаларды қолдап, оларды дамытуға мүмкіндік беру. Байқауға еліміздің түкпір-түкпірінен 200-ден астам өтінім түсіп, іріктеу нәтижесінде үздік 15 жоба финалдық кезеңге жолдама алды. Ал финалистер өздерінің инновациялық жобаларын сарапшылар алдында қорғап, үздік атану үшін бақ сынасуда.
