Шымкентте Күзет қызметі басқармасының ұйымдастыруымен үшінші рет шағын футболдан республикалық турнир өтті. Дәстүрлі дода бұл жолы да еліміздің түкпір-түкпірінен келген тәртіп сақшыларының басын бір алаңда қосты. Аталған жарыстың мақсаты – салауатты өмір салтын дәріптеумен қатар, Ішкі істер министрлігінің алдағы чемпионатына қатысатын үздік құраманы жасақтау.
Республикалық турнирге еліміздің әр өңірінен 17 команда, яғни 170-тен астам қызметкер қатысты. Дәстүрлі жарыс әр 3–4 жыл сайын әртүрлі қалада ұйымдастырылып, қызметкерлер арасындағы ынтымақтастықты нығайтуға және тәжірибе алмасуға мүмкіндік береді. Сонымен қатар бұл додада үздік ойыншылар анықталып, Ішкі істер министрлігінің чемпионатына қатысатын құрама жасақталады. Қостанай қаласынан келген Темірлан Дәуілбаев бұл турнирге екінші жыл қатарынан қатысып отыр. Оның айтуынша, жарыс жыл сайын жоғары деңгейде ұйымдастырылады және биылғы ойындар да аса тартысты өтуде.
