Сапалы медицина қайдан басталады? Заманауи құрылғыдан ба, білікті дәрігерден бе, әлде науқасқа деген жанашырлықтан ба? Шымкент қаласындағы №7 қалалық емхана осы үш бағытты қатар дамытып келеді. Еңбекші ауданында орналасқан медициналық мекеме бүгінде қырық мыңнан астам тұрғынға қызмет көрсетіп, заманауи диагностика мен емдеудің қолжетімді орталығына айналған. №7 қалалық емхана тұрғындарға алғашқы медициналық, санитариялық көмек пен консультативтік, диагностикалық қызмет көрсетеді. Мұнда кардиолог, стамотолог, невропатолог, хирург, офтальмолог, эндокринолог, гастроэнтеролог, уролог, ЛОР және басқа да бейінді мамандар қабылдау жүргізеді. Бүгінде емханаға 40 мыңнан астам тұрғын тіркелген.
Емхана соңғы жылдары жаңа технологиялармен толықты. Дәрігерлер үшін жаңа көмекші пайда болды. Plus AI жасанды интеллект қосымшасы жылдам диагноз қоюға және тұрғындардың арыз шағымын қабылдауға мүмкіндік береді. Сонымен қатар мүмкіндігі шектеулі азаматтарға қолайлы орта қалыптастыру мақсатында А және В корпустары арасында өткел салынған. Емханада ана мен бала денсаулығына ерекше көңіл бөлінген. Мұнда дені сау бала бөлмесі, босануға дайындық кабинеті, психолог, логопед, аудиоскрининг және егу бөлмелері жұмыс істейді. Жас аналар үшін қолайлы жағдай жасалып, балалардың дамуын бақылау мен профилактикалық тексерулер тұрақты жүргізіледі.
Медициналық мекеменің зертханалық мүмкіндігі де кеңейген. Заманауи қан талдау құрылғылары арқылы жұқпалы ауруларды ерте анықтауға мүмкіндік бар. Мамандардың айтуынша, зертханалық диагностика көмегімен вирустық гепатиттерді, бруцеллезді және өзге де инфекциялық ауруларды анықтау жұмыстары жедел әрі нақты жүргізіледі. Жылдамдығы соншалықты мұндағы аппараттар 1 минут ішінде 1 қан сынамасын толық тексеруге қауқарлы. Бұл науқастың уақытылы ем алуына жол ашады.
Емхананың ерекше жобаларының бірі тұзды шахта, яғни галотерапия бөлмесі. Демеушілердің қолдауымен ашылған бұл кабинет тыныс алу жолдары ауруларының алдын алу мен оңалтуға бағытталған. Мамандардың айтуынша, тұзды микроклимат бронх демікпесі, аллергиялық аурулар мен тыныс алу жүйесінің кейбір сырқаттарына оң әсер етеді. Бұл тұрғындарға ұсынылатын қосымша сауықтыру қызметтерінің бірі саналады.
