Мегаполистің екі мыңнан астам педагогі бүгін тамыз кеңесінде бас қосты. Бұл жолы білім берудегі негізгі басымдық — цифрландыру технологиясының тиімділігі мен жасанды интеллектке негізделген. Ағарту саласының мамандары ақпараттық технологияның алға озған кезеңінде оқыту жүйесін оңтайландыратын тың тәсіл осы деп отыр. Дәстүрлі жиында сондай-ақ, Шымкент қаласының жаңа оқу жылына дайындық барысы, білімдегі бетбұрыстар жайы сөз болды.
Жаңа оқу жылы қарсаңындағы тамыз конференциясы — білім берудегі цифрлық инновациялар және цифрландыру, жасанды интеллект технологияларын енгізуге негізделген. Технологиясы мен инновациясы дамыған алпауыттардың арасында Қазақстанның алға қойған мақсаты — дамыған 30 елдің қатарына қосылу. Ол ретте еліміздің білім беру жүйесі әлемдік стандарттардан қапы қалмауы тиіс. Екі мыңнан астам педагог қатысқан жиынды қала әкімі ашып берді. Талантты шәкіртің артында талапты ұстаздың тұрғанын айтқан Ғабит Әбдімәжитұлы жаңа оқу жылымен құттықтады.
Шымкенттік педагогтердің басқосуына салалық министрлік өкілдері де қатысты. Оқу-ағарту министрінің видеоқұттықтауын жеткізіп, білімдегі жаңалықтармен бөлісті. Ақзира Бақтыбайқызының айтуынша, оқулықтар 100% цифрландырылған. Білім сапасын арттыра отырып, оқу-тәрбие процесін жеделдету және жеңілдету, балаларға, ата-аналарға жүктемені азайту, бәсекеге қабілеттілікті арттыру үшін қолданысқа енгізілген “Цифрлы ұстаз” жобасы жайлы айтты.
Жиын барасында бірқатар ұстаздар марапатталды. Қала әкімінің алғыс хаты, Ы.Алтынсарин төсбелгісі, «Білім беру ісінің құрметті қызметкері» марапаты мен Оқу-ағарту министрлігінің Құрмет грамотасы және салалық министрдің алғыс хатын алған ағартушы ұстаздар білімі мен тәрбиесін өнегелі ұрпақ өсіруге арнап жүрген кәсіби мамандар.
Конференцияда инновациялық жобалар мен цифрлық платформалардың қатысуымен жасанды интеллект, виртуалды шындық, STEM білім секілді нақты тақырыптарға арналған көрме ұйымдастырылды. 20-дан астам ғылыми жұмысты шаһар басшысы аралап, жас ғалымдардың жұмысымен танысты. Соның бірі Robo park қосымша білім беру орталығының өнертапқыштары жасаған құрылғы.
Жаңа оқу жылында білім саласындағы жаңашылдық — мұғалімдерді аттестаттау және марапаттау жүйесінің толық автоматтандырылуы. Одан бөлек — балабақша мен мектеп арасындағы байланыстың ұлғаюы. Ұлттың бәсекеге қабілеттілігін арттыратын цифрлық білім беру үдерісінде шаһардың бірқатар жетістігі бар. Мәселен, 2022-23 оқу жылында цифрландыру бойынша республика бойынша көш бастаған болатын. Білім саласының бүгіні мен болашағы жайлы алуан пікірлер айтылатын тамыз кеңесінің секциялық жұмысы — білім берудегі цифрлық инновациялар, жасанды интеллектіні орта білім беру жүйесіне интеграциялау, педагогтердің цифрлық құзыреттіліктерін дамыту, балалардың құқықтарын қорғау,психологиялық, қосымша, инклюзивті білім берудегі цифрландыруға арналған. Шымкент қаласы 2024 жылғы 21 тамызда Астана қаласында өтетін Саммитке ҚР Оқу-ағарту министрлігінің өңірлер бойынша бөлінісіне сәйкес Шымкент қаласынан 38 делегация мүшесі қатысатын болады.
