Төраға Мәулен Әшімбаев бастаған бір топ сенаторлар Шымкентке келді. Жоғарғы палата ұлттық бірегейлікті сақтауда мегаполистің маңызды мәртебесі бар екенін ерекше атап өтті. Ал, қала әкімі мемлекет саясатын іске асыру мен шаһардың тынысын кеңейту жолындағы тындырымды тірліктер толастамайтынын, артылған сенім аясында экономикалық өсімді айшықтап, әлеуетті арттыратын жұмыстар жалғаса беретінін айтты. Парламент-әкімдік-мәслихат пен қоғам өкілдерінің арасындағы кездесуде бірқатар мәселелер көтеріліп, ұсыныстар айтылды.
Парламенттің жоғарғы палатасы Сенаттың төрағасы Мәулен Сағатханұлы Шымкент қаласынан сайланған депутаттар мен аграрлық мәселелер, табиғатты пайдалану және ауылдық аумақтарды дамыту комитетінің төрағасын бастап, мегаполиске келді. Қала әкімдігінде өткен кездесуге мәслихат депутаттары және қоғамның өкілдері қатысты. Ашық форматтағы жүздесуді Сенат төрағасы бастап, Шымкенттің тарихи-саяси беделі зор, көпке үлгі екенін айтты. Сонымен қатар, Президент Жолдауы мен Үкіметтің кеңейтілген отырысында берген тапсырмаларын іске асыру бағытындағы міндеттерді нақтылады. Шаһардың дамуында Сенаттың ықпалы және Палата мен мәслихаттардың бірлесе жұмыс істеуі маңызды. Осы ретте Мәулен Сағатханұлы аталған салада жұмыстың жаңа форматы қажеттігін айтты.
Жиында Сенат пен мәслихаттардың бірлескен жұмысының маңызды басымдықтары айтылды. Сегізінші шақырылымдағы екінші сессияда 102 заң қабылданса, оны қарауда мәслихат депутаттары, сарапшылар мен азаматтық қоғамның өкілдері жұмылдырылған. Палата спикерінің айтуынша, жергілікті өкілді органдардың ұсыныстары мен бастамалары өңірлерді дамыту жұмысы төңірегінде қозғалатын мәселені шешуде маңызға ие.
Мәулен Әшімбаев сөз барысында қала әкімінің жұмысы жүйелі екенін айтып, алдағы уақытта жоспарлы бағыттар бойынша жалғастыра беру керегін атап өтті. Сенатордан соң мінберге шыққан Сыздықбеков қала экономикасын өрлететін негізгі бағыттарға тоқталды. Өндірісті көркейтіп, өнеркәсіпті дамыту мақсатында шетелдік инвесторлармен жүргізілген келіссөздермен таныстырды.
Мегаполиске келудегі мақсат түсіндіріліп, алдағы жұмыстар жайы айқындалған соң сұрақ-жауапқа көшті. Мәслихат депутаты Қайрат Есенбек Шымкентте ауыл шаруалық бағытындағы жерлерге төленетін салықтың мөлшері көршілнес облыстарға қарағанда едәуір жоғары екенін айтып, оны Заң шеңберінде қарастыруды сұрады.
Қоғамдық кеңестің мүшесі Бауыржан Әлтеев қаладағы кептеліс, автотұрақ мәселесін көтерсе, депутат Альбина Елшиева мәслихаттың мәртебесін арттыруды керегін айтты. Ал, ардагерлер ұйымының төрағасы Төлебаев Кенжехан бастауыш сыныпта әдет-ғұрыпты насихаттайтын бағыт болу керегін тілге тиек етті.
Қоғамдық кеңеске мүше Біржан Байтуов күнгейден теріскейге көш мәселесін қозғады. Стратегиялық маңызға ие мәселе аясында адам аз қоныстанған өңірлерге оңтүстіктің азаматтарын көшіру бағытында жаңа бастамалар керек дейді ол. Ақын сондай-ақ, ұлттық құндылыққа қарсы шабуыл жасаған әлеуметтік желінің асауларына тұсау керек деп санайды.
Екі сағатқа жуықтаған жиында мегаполистегі өзекті деген, республика деңгейінде шешілуі керек түйткілдер айтылды. Инфрақұрылым және логистика мәселелерін шешу барысы талқыланды. Мәулен Әшімбаев әрбір мәселе оң шешімін табуы үшін алдағы сессияда республика бюджетін қараған кезде сенаторлар аталған басымдықтарды және мәслихат депутаттарының ұсыныстары назарда болатынын айтып, кездесуді қорытындылады.
