Қазақстан бойынша барлығы 7 550 мектеп бар. Олардың ішінде шағын жинақты мектептер саны — 2 753.
Барлық оқушы саны — 3,6 млн. Шағын жинақты мектептердегі балалар саны — 192,6 мың. Дегенмен, мектеп жетіспеушілік мәселесі әлі де бар. Әсіресе, бұл мәселе еліміздің халқы тығыз орналасқан Оңтүстік өңірлерінде айқын сезілуде. Оның ішінде еліміздің үшінші мегаполисі Шымкент те бар. Жыл сайын мемлекеттік-жекешелік әріптестік аясында білім мекемелері салынғанымен сонда да демографияның өсіміне қарай жетіспеушілік байқалуда. Дегенмен, аталмыш мәселенің түйінін шешу мақсатында жұмыстар үздіксіз жүргізілуде. Мәселен,
бүгінде Шымкентте 7 білім нысанында қосымша ғимарат құрылысы жүргізілуде. Бүгін қала әкімі Мұрат Әйтенов аумағы кеңейтіліп жатқан бірқатар білім ошақтарының құрылыс жұмыстарымен танысты.
Сайрам шағынауданындағы №65 мектеп-гимназиясының қосымша 600 орындық оқу корпусы бой көтеруде. Соңғы үлгіде салынған ғимаратта сынып бөлмелері, кітапхана, логопед кабинеті, спортзал, 220 орынға арналған асхана қарастырылған.
Мұрат Дүйсенбекұлы Ш.Қалдаяқов көшесіндегі №45 мектеп-гимназиясында да болып, 300 орынға арналған 3 қабатты қосымша ғимараттың құрылыс-монтаж жұмыстарын қадағалады. Заманауи талапқа сай салынған оқу корпусында сынып бөлмелерінен бөлек, спортзал, зертхана бөлмелері, 78 орынға арналған асхана қарастырылған.
“ Ғимараттардың интерері классикалық үлгіде болуы керек. Бұл ретте дизайнерлермен тиісті жұмыстарды жүргізіңіздер. Құрылысқа қатысты өзекті мәселелер дер кезінде шешілуі тиіс” — деді қала әкімі.
Мұрат Дүйсенбекұлы М.Х.Дулати атындағы №8 мамандандырылған гимназиясының да қосымша корпустарының құрылысын тексерді. 1 100 орынға арналған ғимаратта сынып бөлмелері, 250 орындық акты залы, спортзал, 320–орындық асхана құрылысы жобаланған.
Қала әкімі жауаптыларға сапасыздыққа жол бермей, нысандарды өндірістік кестеге сай саяқтап, үш ауысым мәселесін түбегейлі шешуді тапсырды.