Қала әкімі Мұрат Әйтенов бірқатар нысандарда болып, жол құрылысын қадағалады. Алдымен Бәйдібек би-Арғынбеков көшелерінің қиылысында салынып жатқан жолайрық құрылысының барысын тексерді. Жобаға сәйкес жолайрық үш деңгейлі.
Төменгі деңгейде Арғынбеков көшесі, жоғарғы деңгейде Бәйдібек би даңғылы, ортаңғы деңгейде оң жақ бұрылыстар мен сақиналы жол орналасатын болады. Нысанды жыл соңына дейін қолданысқа беру жоспарлануда.
«Қалада көлік кептелісін азайту үшін Арғынбеков көшесі мен Бәйдібек би даңғылының оң жақ өткелдерін 10 мамырға дейін кезең-кезеңімен көлік қоғалысына ашуды ұйымдастырыңыздар. Нысанды өндірістік кестеге сай тапсыру үшін жұмыс қарқынын арттыру қажет» — деді қала әкімі.
Қазір А-2 автомобиль жолында құрылыстың екінші кезеңі жүруде. Қала басшысы Ынтымақ шағын ауданына баратын жол қиылысынан Темірлан тас жолына дейінгі аралықты құрайтын аумақтың құрылысымен танысты. Ені 30 метр, 4 жолақты жолдың екі жағында ирригациялық жүйе мен жасыл аймақ, тратуар, жарық шамдар орнату қарастырылған. Қазір сақина типті жолайрық құрылысы жүргізілуде.
Нысанды биыл тамызда аяқтау жоспарлануда.
А-2 айналма тас жолының 4 кезеңі Темірлан тас жолынан Бадам өзеніндегі көпірге дейінгі аралықты қамтиды. Осыған дейін қайта құру жұмыстарының жартысынан астамы орындалды.
Бұдан бөлек, дәл осы күні қала әкімі Мұрат Әйтенов бірқатар құрылыс нысандарын аралап, жұмыс барысымен танысты. «Металлург» стадионын реконструкциялау жұмыстарын тексеріп, құрылыс сапасын қадағалады. Озық үлгідегі ғимаратта әкімшілік-тұрмыстық корпустан бөлек спорт залдар, спорттық тренажерлер алаңшасы мен бір жарым мың орындық трибуна қарастырылған.
«Жұмыс қарқынын күшейтіп стадионды 1-маусым — Халықаралық балаларды қорғау күніне орай ашу қажет. Осыған орай реконструкциялық жұмыстардың барысын, құрылыс сапасын қатаң бақылауға алыңыздар» — деді қала әкімі.
Әкімшілік-іскерлік орталығындағы жаңа тұрғын үйлер алабында инженерлік-коммуникациялық инфрақұрылым жұмыстары қарқынды жүргізілуде. Құрылысқа 20 адам, 8 техника жұмылдырылған. Мұрат Дүйсенбекұлы жаңадан бой көтерген 8 көпқабатты тұрғын үйдің инфрақұрылымымен танысты. Қазір мұнда ирригациялық жүйелер салынып, балалар ойын алаңшасы бой көтеруде. Қала әкімі абаттандыру, көріктендіру жұмыстарын сәуір айында толық аяқтауды тапсырды.
Сондай-ақ қаладағы магистральді, ішкі орам көшелерін аралап, жауын-шашыннан орын алған кемшіліктерді қалпына келтіру жұмыстарын тексерді. Осыған дейін қала аумағында 43 көше қайта жөндеуден өтті. Бұл бағыттағы жұмыстарды 12 бригада атқаруда. Мұрат Дүйсенбекұлы жауаптыларға құрылыс нысандарын уақытылы тапсыруды, өндірістік кестенің сақталуын, сапаны ұдайы қадағалауды тапсырды.
