Биыл ұлт ұстазы Ахмет Байтұрсынұлының туғанына 150 жыл толды. Осыған орай, Әль-Фараби атындағы ғылыми-әмбебап кітапханасының ұйымдастыруымен семинар өтті. Жиын барысында, Бірқатар зиялы қауым өкілдері Қазақтың рухани көсемі жайлы баяндама оқып, оның ұлтқа сіңірген енбектерін сөз етті.
Басқосуға Ордабасы ауаданының құрметті азаматы, жазушы Захардин Қыстаубайұлы, М. Әуезов атындағы Оңтүстік Қазақстан Университетінің аға ғылыми қызметкері Ақжол Қалшабек пен Оңтүстік Қазақстан Университетіның кафедра доценті Мамыт Алтыбайұлы, сондай-ақ, Жоғарғы оқу орындарының студенттері мен оқушылар қатысты. Жиын барысында сөз алғандар ағартушы әрі Алаш қозғалысының қайраткері Ахмет Байтұрсынұлының өмірбаянынан сыр шертіп, қазақ руханиатына қосқан үлесі жайлы сөз қозғады.
Ахмет Байтұрсынұлы — қазақ тілінің ғана емес әдебиеттану саласының да негізін қалаушы. Ұлт ұстазының басты мақсаттарының бірі-халықтың көзін ашып, білім нәрімен сусындату болды. Ол ақын да ғалым да болды. Ендігі кезекте ұлтын ұлықтап, өркениетінің негізін қалаған тұлға ретінде дәріптеп, насихаттау ұрпағының парызы екені айтпаса да мәлім. Айта кетсек, биыл Ахмет Байтұрсынұлының 150 жылдығы ЮНЕСКО көлемінде аталып өтпек. Бұл ретте аталмыш іс-шаралар ауқымды жобалардың байтамасы болғалы тұр.
