Ең маңызды әлеуметтік мәселенің бірі — тұрғын үймен қамтамасыз ету. Халықтың қажетіне қарай мемлекет тарапынан көптеген бағдарламалар қабылданды. Соның бірі «Бақытты отбасы» бағдарламасы.
«Бақытты отбасы» бағдарламасына 20-маусым мен 19-шілде аралығында өтініш қабылдау басталған болатын. Ол бойынша көпбалалы отбасылар, мүмкіндігі шектеулі бала тәрбиелеп отырған және толық емес жанұялар қатысқан болатын.
2022 жылы «Бақытты отбасы» бағдарламасы бойынша 5 мыңнан астам отбасыға несие беру жоспарланған. Бағдарламаға қатысушыларға бөлінген лимиттерді бөлу кезінде басымдық – мүмкіндігі шектеулі балаларды тәрбиелеп отырған отбасыларға берілетінін «Отбасы банк» АҚ айтқан болатын.
Жаз мезгілінде қабылдау басталған «Бақытты отбасы» бағдарламасының нәтижесі baspana.kz маркетінде азаматтардың жеке кабинетіне шықты. Отбасы банкі жариялаған ақпараттарға сәйкес қатысушылардың төлем қабілеттігін бағалау ағымдағы жылдың 07-30 қараша аралығында жүргізіліп, азаматтардың тұрғын үйді таңдау кезеңі ағымдағы жылдың 8 желтоқсанынан басталады. Іріктеу мерзімі аяқталған соң банк іректеуге арналған құжаттарды қабылдамайды. Аталған тұрғын үйлер Шымыкент қаласының Арғынбеков және Тұран шағын аудандарында орналасқан.
2022 жылы Шымкент қаласына «Бақытты отбасы 2-10-20» бағыты бойынша жалпы саны 472 отбасына оның ішінде көпбалалы отбасылар — 245 , мүгедек бала асыраушы отбасылар — 187, толық емес отбасыларға — 40 лимит бөлінді. Енді «Бақытты отбасы» бағдарламасының қатысушылары таза әрлеудегі әкімдіктің тапсырысымен салынған үйлерді алады. Әлеуметтік тұрғын үй 3-4 жайлылық класына сәйкес келеді. Шымкенттік отбасыларды шаттыққа бөлеген «Бақытты отбасының» ең үлкен пәтерінің ауданы 80 шаршы метрге дейін қарастырылған.
Аталған бағдарламаның шарты бойынша: қатысушыларды іріктеу кезінде азаматтардың кірісі тексеріледі, соңғы алты айда отбасының әрбір мүшесіне шаққандағы табыс ең төменгі күнкөріс деңгейінің 3,1 еселенген мөлшерінен аспауы керек. Бағдарлама аясында жергілікті әкімдік арқылы салынған кредиттік тұрғын үйді, жаңа және қолданыстағы пәтерлерді, сондай-ақ жер үй де сатып алуға болады.
Отбасы банктің ақпаратынша, бүгінде «Бақытты отбасы» бағдарламасының арқасында 14 500 қазақстандық отбасы қоныс тойын тойлаған.