«ТАЗА ҚАЛА» ҮЗДІКТЕРІ МАРАПАТТАЛДЫ

«Таза қала» үздіктері марапатталды. Естеріңізге сала кетсек, Шымкент қаласы Азаматтық Альянсының ұйымдастыруымен қазан айында «Таза қала» акциясы өткен болатын. Аталған шара нәтижесі бойынша белсенділік танытқан бірқатар қала тұрғындарына алғыс хат табысталып, қаржылай сый-сияпаттар берілді. Бүгінде өз мәресіне жеткен байқауда Шымкент қалалық ішкі саясат және жастар істері жөніндегі басқармасы мен Шымкент қаласы Азаматтық Альянсының өкілдері жеңімпаздардың жүлдесін салтанатты жағдайда табыстады. Қала тазалығын ұстауды насихаттайтын акция шаһарда осымен оныншы рет өтіп отыр.

Аталған акцияға атсалысып, қала көркіне өз үлесін қосып жүргендердің бірі — Ұлдар Кенжебаева. Бұған дейін бірнеше рет аталған жобалар басы қасында жүріп, тазалықты насихаттау мақсатында түрлі шараларға қатысқан. Бүгінде еңбегі еленіп, Абай ауданының атынан шыққан ол жүлделі бірінші орын иегері атанды. Айта кетсек,«Таза қала» акциясы аясында арнайы комиссия құрылып,  қаладағы 4 ауданнан «Үздік аула», «Үздік көше», «Үздік үй», «Үлгілі коммуналдық қызметкер», «Үздік шағынаудан» аталымдарына сай жеңімпаздарды анықтаған. «Үздік аула» номинациясы бойынша Әл-Фараби ауданы атынан 3-орын иемденген Дана Бектаеваның сөзінше, өкінішке орай, кейбір аула тұрғындарының белсенділігі өте төмен. Сол себепті де қала көркі кейбір жағдайда көңіл көншітпейді. Айта кетейік, акцияның жүлде қоры 4 миллион 300 мыңды құрайды. Әр ауданға 1 миллионнан бөліп, қалған қаражат ұйымдастыру жұмыстарына бағытталған. Жалпы нәтижеге сәйкес 5 аталым бойынша әр ауданнан 15 үздіктен 60 азамат марапатталды.