ДЕПУТАТТАР АБАҚТЫДАҒЫ ЖАҒДАЙМЕН ТАНЫСТЫ

Сенаторлар казармалық қамаудан камералық түрге көшуді және барлық абақтыларға бейнебақылау орнатуды ұсынып отыр. Бұл туралы Депутаттар №54 түзету мекемесіндегі жазасын өтеушілермен өткен кездесуде мәлімдеді. Айтуларынша, қылмыстық атқару жүйесінде бірқатар қордаланған мәселелер жетерлік, сондықтан бейнебақылау камерасының жоқтығы алаңдаушылық тудыруда.

Бұл түзету мекемесі халық арасында №31-абақты деп аталады. Қазір мұнда 800 тұтқын бар. Ең алдымен, Сот жүйесі және құқық қорғау органдары конституциялық заңнамасы комитетінің құрамына кіретін Парламент Сенатының депутаттары науқас сотталғандардың қандай жағдайда емделіп жатқанына назар салды.

1 қаңтардан бастап бұл мекемеде науқас жазасын өтеушілерді орналастыруға арналған изолятор мен төсек орындары пайда болған. Енді мұнда олар азаматтық дәрігерлердің қызметіне жүгіне алады және жазасын өтеушілерді ауруханаға апарудың қажеті жоқ. Мекеме қызметкерлері Сенат депутаттарына асхананы көрсетіп, тұтқындардың ас мәзірімен таныстырды. Сенаторлардың пікірінше, аталған түрме ескі орыннан камералық жағдайға әлдеқашан көшуі керек. Себебі бұл түзеу мекемесі осыдан 60 жыл бұрын салынған. №54 түзету мекемесінде өндірістік аймақ бар. Жазасын өтеушілер тігін тігумен, жиһаз, ағаштан ас үй ыдыстарын жасаумен, тіпті музыкалық аспаптар жасаумен айналысады. Соның бірінде ҚР парламентінің депутат Амангелді Толамисов ойнап, қолөнер туындысымен танысты.

Мекеменің ішкі жай-күйімен танысу барысында депутаттар жазасын өтеушілердің қылмыстық істері бойынша қордаланған сұрақтары мен өтініштерін тыңдады.  Қылмыстық атқару жүйесінде көптеген сұрақтар қордаланып қалған. Бұл ретте, мекеме аумағында толық бейнебақылаудың жоқтығы депутаттарды да алаңдатып отыр. Депутаттардың айтуынша, абақтыдағы мәселелер Парламент қабырғасында бірнеше рет көтерілген.Алдағы уақытта назардан тыс қалмай, бірте-бірте шешімін таппақ.