«БІЗ ЖҰЛДЫЗ БОЛЫП ЖАНАМЫЗ»

Шымкентте мүмкіндігі шектеулі жандардың қатысуымен шығармашылық кеш өтті. Шарада талантымен танылған өнерпаздар түрлі қолөнер туындыларын ұсынып, ән-биден шашу шашты. Жиын барысында, үздік өнер көрсеткен қатысушылар марапатталып, оларға алуан түрлі сый-сыйапаттар табыс етілді.

Жоба алдымен жас шеберлердің қолынан шыққан бұйымдар көрмесімен бастау алды. Мұнда талантты жастар құрақ көрпе, жастық, сондай-ақ, моншақтан жасалған туындылар мен ағаштан жасалған музыкалық аспаптар сынды әр алуан қолөнер еңбектерін паш етіп, көпшілік көзайымына айналды. Солардың бірі Ақтөре Шалдарбек. Осыдан бірер жыл бұрын моншақтан түрлі ойыншықтар жасауға қызығушылық танытып, хобби ретінде шығармашылықпен айналысуға бел буған. Бүгінгде бұл істе жұбайы қолдау білдіріп, көмек көрсетіп келеді.

Қолөнер туындылары ұсынылған көрмеден соң, салтанатты жиын ән-би қойылымына ұласты. Шығармашылық кеш барысында, қатысушылар қонақтарға түрлі концерттік нөмірлер ұсынып, өз бойларындағы таланттарын көрсетті. Бірі әуезді әнмен көпшіліктің көңілін жауласа,енді бірі мың бұрала билеген биімен тамсандырды. Аталған кеште бірнеше шетелдік конкуртардың жеңімпазы Асхат Ахметжан да өнер көрсетті. Ол өзінің арбаға таңылғанына қарамастан музыкалық туындымен ырғала билеп, талайға таңдай қақтырды.

Айтулы жоба барысында Шымкент қаласы Ішкі саясат және жастар істері жөніндегі басқармасының басшысы Мұратжан Шотанов сөз алып, қатысушыларға деген жылы лебізін жеткізді. Ол өз сөзінде еліміздегі азаматтарды мүмкіндігі шектеулі деп бөлмей, барлығына бірдей қолдау көрсетіліп жатқанын атап өтті.

Осыған дейін аталмыш іс-шаралар кешені аясында жастарға арналған арнайы мемлекеттік бағдарламалар мен кәсіпкерлікті меңгеру бойынша курстар, қаланың көрікті жерлері мен мәдени мұражайларға экскурсия жасау, үстел теннисі, шахматтан турнир,сондай-ақ, жас қолөнер шеберлерінің көрмесі өткізілген болатын. Бұл бойынша жалпы саны 200-ге жуық жастар белсенділік танытып, бақтарын сынаған.

Айта кетсек, Мүмкіндігі шектеулі жастарға кедергісіз орта қалыптастыру мен өмір сүру сапасын арттыру мақсатында өткен салтанатты шара Шымкент қалалық ішкі саясат және жастар істері жөніндегі басқармасы және «Халқыма тағзым» мүгедектер қоғамы» қоғамдық бірлестігінің ұйымдастыруымен қолған алынған болатын. Байқау нәтижесінде барлық қатысушыларға ынталандыру сыйлықтары мен түрлі дәрежедегі марапаттар табыс етілді. Ұйымдастырушылардың айтуынша, бұл өз кезегінде барлық конкурсанттарды бөліп жармай, олардың одан ары биік мақсаттарына сеп болмақ.