Еліміздің үшінші шаһары тағы бір әсем гүлзармен толықты. Гүлзар – бау-бақша, саябақ, мекеме және тұрғын үй маңын, жол бойын көгалдандыру үшін әсем гүлдер өсірілетін алаң. Мұндай көрсе көз тартарлық жерлер Шымкентте аз емес. Бүгінге дейін қалада бірнеше гүлзар бар еді, енді 11- шы шағын ауданына қарасты гүлзардың құрылысы аяқталып, ел игілігіне берілді.
Нысанның ашылуына қала әкімі М.Әйтенов арнайы барды. Сондай-ақ, мәслихат депутаттары, қоғам белсенділері қатысып, жергілікті тұрғындармен қуаныштарын бөлісті.
Халықты жаңа гүлзардың ашылуымен құттықтаған шаһар басшысы, демалыс аймағын күтіп ұстаудың маңыздылығына тоқталып өтті. Себебі, көздің жауын алатын гүлдер мен жасыл өскіндер көпшіліктің көзайымына айналуы тиіс.
Гүлзардың аумағы 1,600 га қамтиды. Мұнда амфитеатрмен қоса, құрғақ субұрқақ, сыйымдылығы 140 м3 болатын жер асты су сорғысы орнатылды.
Сонымен қоса ересектер мен балаларға арналған демалыс аймағы, шахмат, үстел теннисін ойнауға болатын ойын алаңы, велосипед қойылатын жер, биодәретхана, көше тренажерларының спорт және трансформаторлық қосалқы станциясы, арқан паркі қарастырылды.
Құрылыс ауданы – 87,00 шаршы метр, қатты жабын ауданы – 2302,00 шаршы метр, көгалдандыру ауданы – 7488,00 шаршы метр.
Аталған нысанның құрылысы былтыр маусым айында басталып, белгіленген мерзімінен бұрын пайдалануға берілуде.
Ресми ашылу салтанатынан соң қала әкімі тұрғындармен бірге гүлзарға ағаш екті.
Қараусыз қалғандай күй кешкен жердің әдемі әрі демалыс аймағына айналуы — көптің ризашылығын тудырды. Жергілікті жұртшылық игі іске алғыс білдірді.
