Тәуелсіздік жылдарында Қазақстанда инвестициялық салада қыруар жұмыстар атқарылды. Республика егемендіктің алғашқы онжылдықтарында жаңа перспективалы жобаларға инвестиция салу жөніндегі шетелдік инвесторлардың ұсыныстарын белсенді қабылдады. Қалыптасу жылдарында Қазақстанға сыртқы қолдау қажет болды, дәл осы шетелдік инвестициялардың ағыны ел экономикасының жүйелі дамуына, тіпті белгілі бір дәрежеде өсудің драйверіне айналуы мүмкін еді. Бүгінгі таңда Қазақстан пайдалы инвестициялардың жаңа мүмкіндіктері мен орасан зор әлеуетін көрсетуде. Біздің республикамыз стратегиялық маңызды жерде орналасқан, бизнесті жүргізуге, инвесторлардың құқықтарын қорғауға және инвестицияны ынталандыруға қолайлы жағдай жасайды.
Бүгінгі таңда біздің еліміз инвесторларды Қазақстан мемлекетінде жұмыс істегісі келетіндердің лайықты қатарынан сенімді түрде таңдай алады. Қазақстан тәуелсіздік жылдарында 120-дан астам елден 330 миллиард доллар шетелдік инвестиция тартылды. Инвестициялардың негізгі бөлігі – 50%-дан астамы – Еуропалық Одақ елдеріне, Америка Құрама Штаттарына – 15%-ы тікелей шетелдік инвестициялар, 5%-ға жуығы Ұлыбритания мен Қытайдан келген инвестицияларға тиесілі. Ал соңғы жылдары Орта Азиядан да инвесторлардың қатары көбеюде. Инвесторларды тартудан Шымкент қаласы да қолайлы аймақтар қатарында. Тоғыз жолдың торабындағы шаһарға шетелдік инветорлар көптеп қызығушылық танытады. Мәселен, өткен аптада Шымкент қаласының әкімі түркиялық «Coca-Cola İçecek» компаниясының Алматы қаласындағы директоры Мустафа Белтекинмен кездесті.
Үшінші мегаполис мүмкіншіліктерін атап өткен шаһар басшысы компания өкіліне Шымкенттен осы сусындарды өндіретін арнайы өндіріс орнын ашу үшін барлық жағдайдың бар екендігін айтып, Шымкенттің салалық мүмкіншіліктеріне тоқталды.
Қала басшысы өз сөзінде биыл ауданы 306 гектарды құрайтын «Жұлдыз» жаңа үшінші индустриялық аймағының құрылғанын, қазіргі таңда инженерлік желілерді тарту жұмыстары жүргізіліп, құрылыс жұмыстарының таяуда аяқталатынын алға тартты. Инвесторларға ұзақ мерзімге жалға берілетін тегін жер телімдері, дайын инфрақұрылымдар мен коммуналдық қызметтерге тарифтер төмендетілгенін де жеткізді.
«Бүгінгі кездесу екі жақты ынтымақтастыққа септігін тигізіп қана қоймай, Шымкенттегі жаңа инвестициялық жобаны жүзеге асырудың алғы шарты болатынына сенімім мол»,-деді ол.
«Coca-Cola İçecek» компаниясының өкілі әкімдік тарапынан арнайы жер телімі және инфрақұрылыммен қамтылу жағынан қолдау болса, инвестиция құюға әзір екендіктерін жеткізді.
