ТҰТЫНУШЫЛАРДЫҢ ҚҰҚЫҒЫ ҚАЛАЙ ҚОРҒАЛУДА?

  Мегаполисімізде тұтынушылар құқығын өрескел бұзатын кәсіпкерлер жетерлік. Қарапайым халықтың құқығына немқұрайлы қараған бизнес қауымдастықтарды не күтіп тұр? Аталмыш мәселеге қатысты мемлекет басшысының тапсырмасы қалай жүзеге асырылуда? Бұл жайында қаламыздың тұтынушылар құқығын қорғау департаменті басшысының орынбасары Бақытжан Салхожаев мәлімдеді.

Нарықта тауар түрі көп. Оларды таңдау кезінде сапасы мен сақталу мерзіміне назар аудару қалыпты жайт. Алайда осындай жағдайларға мән бермей тауарды сатып алған соң ғана сан соғып, өкінетініміз жасырын емес. Осы орайда тұтынушылардың құқықтарын қорғау саласының жекелеген секторларындағы проблемалар жүйелі сипатқа ие екендігін түсінуіміз қажет.

Тұтынушылардың құқығын қорғау комитетінің Шымкент қаласы бойынша департаментіне 2021 жылы 491. Ал 2022 жылы 1205 өтініш түскен. Бұл ретте өткен жылмен салыстырмалы түрде қарасақ тұрғындар шағымы 2.5%-ға өскені байқалады.

Аталмыш сала бойынша қызмет сапасын арттыру мақсатында мемлекет басшысы тапсырма берген болатын. Ол бойынша Қазақстан Республикасы сауда және интеграция министрлігінің тұтынушылардың құқығын қорғау комитеті заң жобасын әзірледі. Бұл қазіргі таңда ақпарат алаңында белсенді талқыланып, мемлекеттік органдармен бірлесіп, пысықталуда.