Еліміздің инфрақұрылымдық дамуы ең маңызды басымдық болып табылады, оны Шымкент қаласының басшылығы шаһар дамуында маңызды мақсат ретінде белгіледі. Инфрақұрылымдық шектеулер еліміздің экономикасының дамуы тұрғысынан негізгі шектеулер екенін түсіну қиын емес. Инфрақұрылымсыз кеңістіктік даму мүмкін емес нәрсе.
Еліміз бүгінде инфрақұрылымды дамытуға қыруар қаржы жұмсауда. Бұл біздің бәсекелестік артықшылығымыз емес екені анық: бізде үлкен қашықтық, орасан зор аумақ, игерілмеген аймақтар да әлі жетіп артылады.
Дегенмен, бізге ескі инфрақұрылым қажет емес, бізге мүлдем жаңа, прогрессивті элементтермен біріктірілген заманауи инфрақұрылым қажет. Яғни, жаһандану заманында бізге әдемі, ыңғайлы инфрақұрылым керек
Бүгінде қала аумағында бұл бағытта жұмыстар жасалынып жатыр. Осы мақсатта қала әкімі Мұрат Әйтенов Тұран шағын ауданындағы инфрақұрылым жүйелерінің құрылыс барысын тексеріп, халықпен кездесті. Осы уақытқа дейін жарыққа жарымай отырған Тұран шағын ауданының тұрғындары біртіндеп сапалы электр қуатына қол жеткізіп келеді.
Тұран шағын ауданын сапалы электр қуатымен қамту жұмыстары былтырдан бері қарқынды жүргізілуде.
Жалпы құрылыс барысы 2 кезеңге жобаланған. Бүгінге дейін 86% орындалып, қалған жұмыс қазан айында толық аяқталады. Одан соң абоненттеу жүргізіліп, 3058 тұтынушы сапалы электр қуатымен қамтылады.
Бұған қоса 11,6 шақырым құрайтын магистралдық кәріз коллекторының құрылысы бітті. Қазіргі таңда ішкі орамдық кәріз жүйесі салынуда, жыл соңына дейін аяқталатын болады.
Бұдан соң әкім Тұрандағы газ құрылысын тексерді. Екінші кезек бойынша жұмыстың 90% орындалып, қазан айы басталғанша №14-29 кварталда орналасқан көпқабатты және 504 жеке тұрғын үй көгілдір отынмен қамтылады.
Ал үшінші кезек бойынша, құрылыс жұмысы ағымдағы жылдың мамыр айында басталған. Бүгінгі күнге 40% атқарылды.
Жалпы Тұран шағын ауданындағы 2554 тұрғын үйге 2023 жылы газ құбыры толық тартылып бітеді. Жұмыстардың жоспарғай сай және сапалы орындалуын талап еткен қала басшысы жауапты мекемелерге нақты тапсырмалар берді.
* * *
Сондай-ақ, мегаполис басшысы М.Әйтенов қалаға іргелес жатқан Тоғыс тұрғын алабына да барып халықпен кездесті. Елді мекенде жаңғыртылып жатқан инженерлік инфрақұрылым құрылысын тексерді.
Қазіргі таңда мұнда 7500-ге жуық халық тұрады. Мектеп, балабақша, мәдениет үйі, дәрігерлік амбулатория, спорт және балалар ойын алаңшасы, тағы да басқа әлеуметтік нысандар қарастырылған.
Алайда атқарылуға тиіс біршама жұмыстар бар. Солардың бірі — ұңғыма салу. Бұл өз кезегінде Тоғыс, Айнатас, Елтай елді мекеніндегі 11 мыңға жуық халықты ауыз сумен қамтамасыз етуге септігін тигізеді. Қазіргі таңда құрылыс жұмыстары қарқынды. Тоғыстан 73 метрлік су ұңғымасы қазылып, болат құбырлар салынуда.
Айта кетерлігі, бұл су ұңғымасы қосымша ұңғыма ретінде жаз айларында қолдану үшін керек.
Қала әкімі тексеру барысында жұмыстың белгіленген мерзімінен кешікпей, сапалы орындалуына күш салуымыз қажет деп, жауапты мекемелерден нәтижелі жұмыс көрсетуін талап етті.
Жалпы Тоғыс жұрты ауыз судан тапшылық көрмеген. Қамтылу көрсеткіші 98,5 % құрайды.
Сол сияқты электр жарығын тұтынушылар да 99%. Биыл 11 абонентті жарықпен қамту үшін жаңадан бағаналар орнатылып, электр желілері тартылды.
Табиғи газбен қамтылу көрсеткіші де 98% құрайды, тек жаңақұрылыс аумағындағы 31 тұтынушының мәселесін шешу үшін келесі жылы жобалық сметалық құжаты әзірленеді.
Мұндағы жолдарға да аса назар аударылуда. Былтыр 2 көше “Ақмая”мен “Айыршық” орташа жөндеуден өтсе, биыл 4 көшеге асфальт төселді. Жалпы мұнда 18-көше бар.
Сонымен қатар осы жылы 2 көше “С.Оспанов” және “Мұнайбарлаушылар” көшесі жарықтандырылды.
Иригациялық жүйелердің жүргізілуі де қала халқы үшін маңызы зор. Ирригацияның болмауы, ескіруі немесе кезінде жекеменшікке өтумен бірге жойылған бұл жүйедегі кемшіліктердің салдарын, көктем мен күз маусымдарында қала тұрғындары көруде. Бұл жүйедегі жетіспеушілік пен олқылықтар ескеріле отырып, шешім жолдарын қарастыру мақсатында ағымдағы жылдың сәуір айында шаһар басшысының бастамасымен құрылған жұмысшы топтың кезекті отырысы өткен болатын. Онда ирригациялық жүйені қажет ететін 150 нүктенің әрбірі зерделеніп, жан-жақты шешу жолдары баяндалған еді.
Су басу қаупі бар нүктелердің басым бөлігі әсіресе мегаполиске жаңадан қосылған елдімекендер екендігін айта кеткен жөн. Себебі онда ирригациялық арықтар осыған дейін мүлде қарастырылмаған. Әбден зерделенген жұмыстың нәтижесінде Еңбекші аудан аумағына қарайтын Маятас тұрғын алабы. Қазіргі таңда Қ.Нысанбайұлы көшесі бойына ирригациялық науалар орнатылуда.
Шым шаһар басшысы Мұрат Әйтенов қалаға шалғай орналасқан елді мекендердің жаңадан орнатылып жатқан ирригациялық жүйелерінің құрылыс барысын тексеріп, тұрғындармен кездесті.
Жалпы Еңбекші ауданы бойынша Тоғыс, Маятас, Бадам-1 тұрғын алаптары мен Шаңырақ шағын ауданында 1,6 шақырымды құрайтын арықтар қазылуда. Екі ай бұрын басталған жұмыс қазан айында аяқталады.
Құрылыс жұмыстарының сапасы мен ауқымын межелеген қала әкімі бұған дейін берген тапсырмаларының тиянақты орындалуын талап етті. Ол: “Ауа райының қандай болатынын болжап біле алмаймыз және мол жауын-шашын жауғанда дайын болу үшін аумақтағы арыз-атыздар салынып бітуі керек”,-деді.
Айтып өтейік, былтыр аудан аумағында 13 мекенжайда 3,3 шқ ирригациялық арықтар орнатылды. Ал биыл жауын-шашын шамадан тыс жауып, 52 мекенжайда су көлдеген. Су басуды алдын-алу үшін бірінші кезекте 7,3 шқ құрайтын 21 нысанға ирригациялық жүйелер салу жоспарланды. Қазірге дейін 14 мекенжайда жалпы ұзындығы 5,3 шқ болатын арықтар орнатылып, бітуге жақын. Олар: Қарабастау тұрғын алабы, Бойыт ата, Қаратөбе тұрғын алабы, Гулабад, Қаратөбе тұрғын алабы, Наурыз, Тоғыс тұрғын алабы, Керуенсарай, Бадам-1 тұрғын алабы, Досметов, Ш.Уалиханов №190, Қызғалдақ, Теріскей №47, Сайрам №38а, Өркен, Б.Момышұлы, Саяжол.
Қалған 31 мекенжайға ирригациялық жүйелер 2023-2025 жылдар аралығында жүргізіледі.
