Шымкент қаласының Қоғамдық денсаулық сақтау департаменті өнімдердің қауіпсіздігіне мониторинг жүргізу барысында бірқатар адам денсаулығына қауіпті өнімдерді анықтады.
Атап айтар болсақ, Нұрсәт мөлтекауданында орналасқан «Береке» азық-түлік дүкенінен «Gulim» сауда белгісінің сиыр етінен жасалған қимасы (өндіруші: жеке кәсіпкер «Молжигитова», Шымкент қ.), «Едим дома» сауда белгісінің сиыр етінен жасалған қимасы (шығу тегі белгісіз, Шымкент қ.) және «Ағайындар» сауда белгісінің сиыр етінен пісірілген мұсылмандық шұжық өнімдері (өндіруші: жеке кәсіпкер «Мансурова И.М.», Жамбыл облысы) микробиологиялық зерттеуге алынды.
Зерттеу нәтижелері бойынша, тағам өнімдерінде ішек таяқшалары тобының бактериялары анықталды.
Бұдан басқа, тексеру барысында «Береке» азық-түлік дүкені қойма, үй-жайлары және тоңазытқыш камераларының температурасын өлшейтін құралдармен толығымен қамтылмағаны анықталды. Шикізат пен өнімнің сапасы мен қауіпсіздігін растайтын құжаттары және өнімнің жарамдылық, сақтау мерзімін және өнім түрін көрсетумен таралық орнында таңбалау заттаңбасы (жапсырмасы) болмаған.
Қазіргі таңда, анықталған кемшіліктер бойынша қима өндіруші «Молжигитова» және «Береке» азық-түлік дүкенінің меншік иесі Қазақстан Республикасының «Әкімшілік құқық бұзушылық туралы» Кодексінің 425 бабының 1 тармағына сәйкес, әкімшілік жауапкершілікке тартылып, анықталған бұзушылықтарды жою туралы ұйғарым берілді. Сонымен қатар, жеке кәсіпкер «Мансурова И.М.»-нің жұмысына қатысты іс-шаралар жүргізу үшін Жамбыл облысының Қоғамдық денсаулық сақтау департаментіне хат жолданды.
Айта кететін жағдай, 2018 жылы 1441 өнімдердің сынамалары тексерілген болатын. Оның ішінде, сәйкес келмейтін өнімдердің саны – 72 сынама (4,9%). Анықталған барлық кемшіліктер бойынша 18 хаттама толтырылып, айыппұл салынды. Нәтижесінде сатылымнан 72,06 кг қауіпті тағам өнімдері алынды.
Шымкент қаласы Қоғамдық денсаулық сақтау департаментінің баспасөз қызметі.
