Шымкентте 500-ге жуық нысан мемлекет меншігіне қайтарылуы мүмкін

Алдағы күндері үшінші мегаполистегі маңызды мәселенің бірі осы болмақ. Жүздеген баспана мен кәсіпкерлік насандарды сырып тастау  қалай жүзеге аспақ? Әрине, бұл оңай шаруа емес. Ол үшін тұрғындарға да түсіндірме жұмыстарын жүргізу маңызды.  Дегенмен, қаланың дамуына оң әсерін береді деген құрылыстың бастапқы кезеңдері де басталып кеткен. Мегаполиске келген сенаторларда аталған жұмыстардың барысымен танысып шықты. 

Қаланың қақ ортасынан Ташкент бағытындағы трассаға шығатын даңғылдарды салу үшін жеке меншіктегі ғимараттар кедергі болары сөзсіз. Ол үшін мегаполис мыңның жартысына жуықтайтын баспаналар мен кәсібін өрге дөңгелеткендердің орынжәйін мемлекеттің меншігіне қайтарып алуы тиіс. Әрине, бұл еліміздің заң талаптарымен жүзеге асатын әрекет.

Келешекте көліктердің Бадам өзенінен өтуіне мүмкіндік беретін өткелдің бастапқы кезеңі басталыпта кеткен. Бұл құрылыс қаланың дамуы үшін маңызды. Аталған бағыт Шымкенттің  орталығындағы Қонаев даңғылын жалғайды. Одан бөлек қалада ірі жобаның тағы бірі жүзеге асып жатыр. Негізінен Қонаев даңғылының ұзындығы 21 шақырымды құрайды. Аталған құрылыс Түркістан көшесінен бастап, Ақтас шағын ауданындағы Республикалық маңызы бар жолға дейін жалғасады.

Жоба жеті кезеңнен тұрады. Бүгінде үш кезеңнен құрылыс жұмыстары басталып кеткен. Мамандардың айтуынша, кезеңдегі барлық жұмыстарға 23 млрд. теңге қажет. Бірінші зерттеудің нәтижесінде қаладағы мемлекет меншігіне қайтарылатын нысандардың саны 475-ке жеткен. Соңғы онжылдықта Шымкенттің жер көлемі үш есеге дейін ұлғайып, тұрғындар саны еселене түскен. Ертеректе салынған қала жолдары қазіргі көлік нөпірін толықтай қамтамасыз ете алмайды. Оған қоса мегаполиске келіп кететін автокөліктерді айтыңыз. Сондықтан миллиардтаған қаржыға атқарылып жатқан бұл құрылыстар текке емес.  Келешек  қаланың дамуы мен өркендеуіне деген қадам деп түсініңіз.

«Айғақ-ақпарат».