100 мыңға жуық қазақстандық Президенттің жастарға қатысты бастамаларына қолдау ретінде әлеуметтік желілердегі аватарларына арнайы фреймдер орналастыруда, деп хабарлайды ҚазАқпарат.
«Қазақстандағы Жастар жылы мен Мемлекет басшысының бастамаларын қолдауға бағытталған аватар ауыстыру бойынша акциямыз өз жалғасын тапты. Енді бұл жұмысты екі жастар ұйымы — «Жаңғыру жолы» мен «Жас Ұлан» ғана жүргізбейді. «Жас Отан» жастар қанаты, «Болашақ» қауымдастығы, Қазақстан Студенттері альянсы және өзге де ұйымдар өз сайттарында аватар үшін фреймдерді орналастыруда», — деді Қазақстан халқы Ассамблеясы «Жаңғыру жолы» республикалық жастар қозғалысының төрағасы Максим Споткай.
Арнайы фреймдерді кез келген азамат «ҚазАқпарат» ХАА-ның қосымша сайт-саттелитінен жүктей алады. Сонымен бірге Facebook пайдаланушылары өз аватарын Generation Q парақшасына кіріп жаңарта алады. Еске салайық, кеше, 23 қаңтар күні Астанада Елбасының қатысуымен «Тәуелсіздік ұрпақтары» тақырыбында Жастар жылының ашылу салтанаты өтті.
Іс-шараға Үкімет мүшелері, ҚР Парламенті депутаттары, жергілікті атқарушы органдар басшылары, ҚР Президенті жанындағы Жастар саясаты кеңесінің мүшелері, «100 жаңа есім» байқауының жеңімпаздары, «Болашақ» бағдарламасының түлектері, жас ғалымдар, шығармашылық, студенттік және жұмысшы жастар өкілдері, жас спортшылар, дарынды балалар, заманауи медиа саласының өкілдері, балалар үйінің тәрбиеленушілері мен түлектері, жас әскери қызметшілер және т.б. қатысты.
Осылайша, елімізде мемлекеттік жастар саясатын жан-жақты қолдау мен жүзеге асыруға бағытталған ауқымды іс-қимыл жоспарын іске асыру бастау алады.
Шара барысында жастар жүзеге асырған табысты жобалар мен жаңа өнімдер таныстырылды. Спикер ретінде әр түрлі салаларда жетістікке жеткен жас қазақстандықтар баяндама жасайды. Мәселен, танымал кәсіпкерлер, стартапшылар, еріктілер, ауыл шаруашылығы, ғылым және әдебиет саласындағы мамандар сөз сөйледі.Дереккөз: ҚазАқпарат.
