ТҮРКІСТАН ОБЛЫСЫНА ҚР ПРЕМЬЕР-МИНИСТРІНІҢ БІРІНШІ ОРЫНБАСАРЫ КЕЛДІ

Бүгін Түркістан қаласына ҚР Премьер — Министрінің бірінші орынбасары Асқар Мамин бастаған жұмысшы топ келді. Облыс орталығының даму жоспарымен арнайы танысуға келген делегацияны аймақ басшысы Жансейіт Түймебаев бірқатар нысандарды аралатып таныстырды.
Алдымен қонақтар Отырар мөлтек ауданында болып, әкімшілік-іскерлік орталығында бой көтеріп жатқан нысандарды аралап көрді. Онда қазіргі таңда 26 көпқабатты тұрғын үйдің құрылыс жұмыстары жүргізілуде. 1536 пәтердің 1200-і (20 тұрғын үй) арендалық үйлер болса, қалған 6 тұрғын үй, яғни 336 пәтер кредиттік баспаналар қатарында.
Биыл қыркүйек айында іргетасы қаланып, мемлекеттік бюджет есебінен салынып жатқан 60 пәтерлі 20 тұрғын үйдің 11-і (660 пәтер) 2019 жылдың сәуір айында тапсырылады. Ал, 9 тұрғын үй (540 пәтер) келер жылдың қараша айына ел игілігіне берілмек. Кредиттік көпқабатты 6 тұрғын үйдің (336 пәтер) құрылыс жұмыстары 2019 жылдың маусым айында аяқталып, пайдаланылуға тапсырылады. Сондай-ақ, онда мемлекеттік — жекешелік әріптестік аясында 280 орындық балабақша мен 900 орындық мектеп бой көтеруде. Одан бөлек, іскерлік орталықта әкімшілік ғимараты, басқармалар және департаменттер үйлері және 5 жұлдызды «Риксос» қонақ үйінің құрылысы басталып кетті. Түркістан қаласының әкімі Әліпбек Өсербаев жұмысшы топқа шахарды инқұрылыммен қамту жоспарымен таныстырды. Түркістан қаласының қазіргі инженерлік инфрақұрылымы қазіргі таңда салынып жатқан әкімшілік –іскерлік орталығының 270 гектар және рухани-мәдени орталығының 98 гектар аумағын қамтамасыз етуге мүмкіндік береді. Айталық, қолданыстағы сағатына 100 мың текше метр газ тарататын автоматты газ станциясы қаланы толықтай көгілдір отынмен қамтуға қауқарлы.
Сондай-ақ, астаналық делегация «Әзірет-сұлтан» мемлекеттік тарихи-мәдени қорығына аялдады. Онда Қожа Ахмет Ясауи кесенесінің маңынан салынатын тарихи архитектуралық жобалардың нобайымен танысты. Аталған аумақтағы 98 гектар жерге жалпы сметалық құны 145 млн. 005 мың теңге болатын Рухани және мәдени орталық салынатын болады.
Атқарылып жатқан жұмыстарға қаныққан Үкімет басшысының бірінші орынбасары Түркістан қаласының дамуы бойынша қорытынды жиын өткізді. Онда облыс әкімі алдағы уақытта жүзеге асырылатын жобалар жөнінде таныстырды.
«Елбасының тапсырмасына сәйкес, Түркістан қаласын дамыту жөніндегі жоспарын іске асыруға өзге облыстардан бөлек, Ұлттық компаниялар мен бизнес өкілдері атсалысатын болады. Бүгінде құрылыс жұмыстарымен айналысатын мердігерлерге қатысты құжаттар әзірленіп, тиісті шаралар атқарылуда. Яғни, жаңадан салынатын нысандарға арналған жер телімдері зерттеліп, дайындалуда. Сондай-ақ, инженерлік коммуникациялар үшін техникалық сипаттамалар жасалып, сәулеттік жоспарлау жұмыстары жүргізілді», – деді Жансейіт Қансейітұлы.
Сондай-ақ, басқосуда Түркістан қаласының өзге де салаларын дамыту бойынша бірқатар министрлер мен министрлік өкілдері алдағы жұмыс жоспарлары жөнінде баяндама жасады. Жиынды қорытындылаған бірінші вице-премьер істі жоспардан кешіктірмей дер кезінде орындауды тапсырды.

Түркістан облысы әкімінің баспасөз қызметі