Шағалалы Шардара қаласында «Болашақ» оқу орталығы ашылды. «Туған жерге туың тік» деген мақал дəл бүгінгі іс-шараға қаратып айтылғандай. Түркістан облыстық маслихатының депутаты Бақытжан Серманизовтың қолдауымен ашылған білім ордасы жатардың зердесін ашып, болашаққа бастайтын даңғыл жолдың алғашқы қадамы болмақ.
«Халықты халықпен, адамды адаммен теңестіретін – білім». Түркістан облысы маслихатының депутаты Бақытжан Серманизов елдің көсегесін көгертуде айтарлықтай үлесі бар азамат. Ал бүгін туған ауылының жастарының білім алуына, сапасының тереңдеуіне үлкен үлес қосып отыр. «Болашақ» оқу орталығы Назарбаев Зияткерлік мектебіне, Білім инновация лицейіне, ҰБТ-ге дайындық жасайды. Білімдерін шыңдап, шәкірттердің армандарына жетулеріне себепші болмақ. Мұнда 4-сыныптан 11 сынып аралығындағы оқушылар келіп білім ала алады. Әр ай сайын сынақ емтихандарын тапсырып, білім нәтижесінің прогресін көріп отырады. Сонымен қатар, орыс тілі мен ағылшын тілдерін оқытатын курсы да бар. 6 жастан бастап 60 жасқа дейінгі тіл үйренемін деген азаматтарға есік ашық. Бағасы халыққа тиімді, әрі қол жетімді.
«Жомартқа қамқорлық жасаған жарасады». Қазақстан инженерлік-педагогикалық Халықтар достығы университетінің ректоры Рабиға Қуатбекова білім ұясының ашылуымен құттықтап, аталмыш оқу орталығына 2 оқу грантын сыйға тартты.
Алдағы уақытта робототехника, энергетика сыныптарын ашуды көздеп отыр. Шəкірттермен профорентация жұмыстары және психолог мамандармен тренингтер өткізіліп, баланың қабілетін, бейімділігін анықтайтын болады. Елге еңбегі сіңген, жас буынға үлгі бола алатын ардагерлері мен аға буын өкілдерімен кездесу өткізіліп, оқу орталығы тәрбиенің тал бесігіне айналмақ. Елге белгілі бірқатар азаматтар ұстаздардың игі бастамасына сәттілік тіледі.
Бала саны 120 орынға жуықталған орталықта білікті ұстаздар жұмыс жасайды. Шәкірттердің ыңғайына қарай екі ауысым бар. Ауданның білім бөлімімен «Болашақ» оқу орталығы арасында меморандум түзілген. Бірлесе отырып жұмыс жасап, жетістіктің шыңына шығатындарына сенімді.
