Сарығаш — шипалы өңір ретінде күллі Қазақстанға ғана емес, алыс-жақын шетелдерге де кеңінен танылған аймақ. Тәуелсіздік алған тұста тұрмыс тураланса да, жердің шұрайлылығы мен судың шипалылығы жүзді төмен салдыртпады. Қазір де туризм нағыз капиталдың көзіне айналған! Ел қоржынын толтыратын бірден бір тетік те осы. Неге десеңіз ауданда орналасқан «Altyn bulak golf & Health Resort» гольф клубы, «Caspian food» ЖШС-нің жүзім шарабын өндіру зауыты мен курорттық шипажайлар туризмді дамытудың алтын көзі. Осы орайда Сарыағаштың бүгінгі туристік әлеуетін бағамдау мақсатындаоблыс әкімдігі арнайы пресс-тур ұйымдастырды.
Бүгінде Түркістан облысында туризмді дамыту мақсатында«Қасқасу» тау-шаңғы кешені, «Шардара» жағажай демалыс аймағы, Түркістан қаласында мәдени-тарихи туризмді дамыту жобасы секілді бірқатар ірі туристік инвестициялық жобалар жүзеге асырылуда. Солардың бірі де бірегейі «Сарыағаш» курорт қалашығы. Аудандағы туризм индустриясын одан әрі дамыту мақсатында 3-4 қараша күндері «SARYAGASH OPEN» ашық турнирі ұйымдастырылды. Біріншілік Көктерек кентінде орналасқан «Altyn bulak golf & Health Resort» гольф клубында өтті. Турнирге Ресей, Түркия, Өзбекстан, Қырғызстан, Тәжікстан елдерінен келген ойыншылар бақ сынады. Жарысқа 21 жастан асқан шет ел және еліміздің ер азамат гольфисттері қатысты. Халықаралық жарыстың тұсаукесерінде сөйлеген облыс әкімі Жансейіт Түймебаев барлық қатысушыларға сәттілік тіледі.
Әуесқойлық турнир Сэнт-Эндрюс Корольдік Гольф Клубының және «Altyn bulak golf & Health Resort» жергілікті ережелеріне сәйкес жеке «Stroke play» форматында өтті.
Мұнан соң, Түркістан облысының әкімі Жансейіт Қансейітұлы Сарыағаш ауданы, Құркелес ауылдық округінде орналасқан «Caspian food» ЖШС-нің жүзім шарабын өндіру зауытында болып, шетелден келген қонақтарға таныстырды. Жер көлемі – 600,0 га құрайтын аумақта 223 адам қызмет етеді. Зауыт жылына 154 мың дана бөтелке жүзім шарабын шығарады. Зауыттың ақ және қызыл шарап өндіру үшін қажетті қуаттылығы жеткілікті, сондай-ақ шығарылатын шараптың сапасына бақылау жүргізетін зертхана бар. Кәсіпорындағы өндірістік кезең еуропалық үздік стандарттарға сай жүзеге асырылады.
«Caspian Food» ЖШС-ін аралау барысында аймақ басшысы мен шетелдік қонақтарға кәсіпорынның жүзім өсіру, шарап жасау ісін дамыту саласындағы жұмысы жөнінде мәлімет берілді. Сондай-ақ, жүзім қабылдау және оны ферментациялау сатысының технологиялық желісімен танысты, сондай-ақ өнім тазартылып, құтыларға құйылатын цехтарды аралап көрді. Сондай-ақ, қонақтарға жүзім алқабы мен жаңғақ егілетін аумақтар көрсетілді. 
Сарыағаш ауданында минералды және термалды суларды пайдалану арқылы сауықтыру туризмі дамып келеді. Шипалы суымен әлемге танылған Сарығаш ауданда 26 емдік сауықтыру орталығы қызмет көрсетеді. Түсірілім барысында солардың бірі «Ақ Тілек» емдеу-оңалту кешені» ЖШС-не табан тіредік. Мұнда медициналық қызметтің сапасын арттыру мақсатында заманауи қондырғылармен жабдықталған. Тамыр ішінде қанды лазермен сәулелендіру ем-шарасы, тұзды шахта, күндізгі стационарларіске қосылған.
Сондай-ақ,алдағы уақытта«Сарыағаш» шипажайының кәріз жүйелері қайта жаңартылмақ. Мәліметтерге сәйкес, 1984 жылы іске қосылып, бүгінгі таңға әбден тозығы жетіп қайта-құрылымдауды талап ететін бекет «Сарыағаш» емдеу оңалту кешенінің теңгерімінде, негізгі қуаты тәулігіне 1000 текше метрге есептелген. Ал қазіргі таңда, Көктерек кентіндегі халық санының ұлғаюына және шипажайлар саны 20-дан аса артуына байланысты кәріз суларының көлемі бұрынғысынан бірнеше есеге артып, апатты жағдайда жұмыс жүргізіп келеді. Бұл туралы аудан әкімі Қайрат Әбдуәлиев өз сөзінде айтып өтті.
Сарыағашта халықаралық туристердің талабына сай қызмет көрсететін орындардың бірі — гольф алаңшасы. Жақын болашақта мұнда ойын-сауық орталықтары, аквапарк пен жаңа курорттық қалашық бой көтермек. Қазір 30-ға жуық емдеу-сауықтыру орталықтары болса, олардың қатары алдағы кезде 96-ға көбеймек. Бүгінгі таңда құрылыс жұмыстарына жеке инвесторлар тартылғалы отыр. Жоба бойынша 600 гектар аумақта сәулеті жарасқан 1500 орындық курортты қалашық. Тіпті ауданда әуежай салынуы мүмкін. Түптеп келгенде, мұның бәрі Түркістан облысындағы туризм саласының жандануына даңғыл жол ашатыны анық.
Жансая Елемесова
