Алматыда жасөспірімдердің қылмысы бойынша 2420 ата-ана мен ойын-сауық мекемелерінің 37 қызметкері әкімшілік жауапқа тартылды, деп хабарлайды Baq.kz ақпарат агенттігі Алматы қалалық ІІД баспасөз қызметіне сілтеме жасап.
Ювенальды полиция қызметкерлері, учаскелік инспекторлар мен криминальды полиция өкілдерінен құрылған топтар күн сайын өзге қалалардан келген жасөспірімдерді деркезінде анықтау үшін жастар мен жасөспірімдер көп шоғырланатын жерлерде рейдтік шаралар жүргізуде.
Өткен жылы кәмелетке толмағандар арасындағы жедел жағдайды тұрақтандыру мақсатында мүдделі органдар мен үкіметтік емес ұйымдардың қатысуымен «Демалыс», «Жасөспірім», «Түнгі қаладағы балалар», «Көше», «Жасөспірім-Заң-Қауіпсіздік», «Еңбекпен қамту» сияқты 17 жедел-алдын алу шарасы өткізіліп, тексерулер жүргізілді. Шара барысында кәмелеттік жасқа толмағандардың заңды өкілдерінсіз түн мезгілінде көңіл көтеру орындарында және үйден тысқары жерлерде жүргені үшін 2420 ата-ана әкімшілік жауапкершілікке тартылды. Ал олардың көңіл көтеру орындарында жүруіне жол берген ойын-сауық мекемелерінің 37 қызметкері сот шешімімен әкімшілік жауапқа тартылды.
«Ағымдағы жылдың басынан бері қала мектептерінде білім органдары, денсаулық сақтау, үкіметтік емес ұйымдар өкілдерінің, прокуратураның қатысуымен оқушылар мен олардың ата-аналары үшін 1 мың 926 тақырыптық дәрістер өткізілді. Шараның басты мақсаты – балаларды қауіпсіз жүріп-тұруға дағдыландыру, оларға уақтылы психологиялық көмек көрсету»,- деді Алматы қаласының ІІД Жергілікті полиция қызметінің ювенальды полиция бөлімінің басшысы, полиция полковнигі Лейла Әліпбаева.
Мектеп оқушылары арасындағы құқық бұзушылықтың алдын алу ісінде ата-аналарды, мұғалімдер мен полицияның мектеп инспекторларын біріктіру болып табылатын мектептердегі профилактикалық кеңестер мен ата-аналардың Қоғамдық Кеңесі елеулі үлес қосуда. Полицияның мектеп инспекторларының бастамасымен оқушылар арасындағы құқық бұзушылықтың алдын алу бойынша 733 кеңес өткізілді.
«Мектептегі полиция инспекторларының, педагогтар ұжымының үйлесімді жұмысы мен оқушылардың өзін-өзі басқаруының арқасында мектеп оқушылары тарапынан жасалатын қылмыс саны 2,7 есеге азайды. Жыл басынан бері комиссия отырысында кәмелетке толмағандардың мүддесіне қатысты әртүрлі фактілер бойынша 150 материал қаралды, нәтижесінде бала тәрбиесі бойынша өз міндеттерін тиісті деңгейде орындамағаны үшін 24 ата-ана ата-аналық құқықтарынан айырылды, 98-і әкімшілік жауапкершілікке тартылды. Арнайы білім беру ұйымына сот шешімімен 9 жасөспірім жіберілді»,- деді полковник Әліпбаева.
Дереккөз: Baq.kz