Қазығұрт ауданында өнеркәсіп өндірісін дамытып, өнім көлемін арттыру бойынша 1,8 млрд. теңгені құрайтын өндіріс ошақтары құрылуда. Ал, елді мекендердегі инфрақұрылымды құру мәселесі де кезеңімен жүзеге асуда екен. Бұл туралы Қазығұрт ауданына әкім болып 1 ай бұрын ғана тағайындалған Төлеген Телғараев айтып берді.
Қазығұрт ауданында кәсібінің нәсібін көремін деп, мемлекеттен көрсетілген қолдаудың шарапатын көріп отырған 6330 кәсіп иесі бар. Олар аудан әлеуетін арттырып, экономикасының түзелуіне сеп болып келеді. Яғни, кәсіпкерлер тарапынан 118,6 млн теңге мемлекет қалтасына түсіп, салығын төленген. Ал, «Бизнестің жол картасы-2020» бағдарламасы аясында 5 жоба мақұлданып, тың бастамалар жүзеге асады деп күтіліп отыр. Ауданға инвестиция тартуда кенжелеп жатқан жоқ. Яғни, аудан кәсіпкерлерінен тартылып жатқан инвестиция ауқымды. Табиғаты қолайлы Қазығұрт ауданының ауыл шаруашылығында да қарқынды өсім бар. Жалпы ауыл шаруашылығына тиесілі жер көлемі жеке азаматтардың еншісіне бұйырып отыр. Яғни ондағы мақсат халықтың екі қолға бір күрек тауып, халықтың нәсібін жерден табуына мүмкіндік жасау. 274004 га жер жеке серіктестіктерге, шаруа қожалықтарына, өндірістік кооперативтердің иелерінің меншігінде. Жалпы егістік егу, жылыжайды жандандыру жұмыстары да жүйелі. «Сыбаға», «Алтын асық», «Құлан» бағдарламалары бойынша тиісті тапсырмалар орындалды дейді аудан басшысы. Қарапайым ауыл тұрғындарының күнделікті табыс көзіне айналдыру үшін жанұялық сүт фермаларын іске қосу мақсатында 50 бірлік жұмыс жасап жатыр. Биылғы жылдың еншісінде 77-ге жеткізу межеленіп отыр. Ал құрылыс саласында ауданға қазынадан қаржы бөлініп, жаңа нысандар бой көтермек. Қазығұрт ауданындағы 64 елдімекеннің 42- сі ауыз сумен қамтылса, ендігі 19 ауылдың халқы үшін сәулет жоспарлау тапсырмасы дайындалып, оның 14-іне жобалық сметалық құжаттары жасалынады. Яғни, ол үшін облыстық бюджеттен 69,6 млн. теңге бөлінуі мүмкін. Газдандыру жүйесі бойынша айта кетсек, 22 елдімекеннің халқы ғана табиғи отынның рахатын көріп отыр. Ал құрылыс аяқталған 31 ауылға түгендеу жұмыстары жүргізілуде. Білім, денсаулық сақтау саласында да көрсеткіш жаман емес. Ауданда жұмыспен қамтылу деңгейі де көш ілгері. Осы жылдың төрт айына 237 жаңа жұмыс орны ашылу жоспарланса, 326 жаңа жұмыс орны ісін бастаған. Негізгі межеде 339 азаматты жұмыспен қамтылу көзделсе, 402 азамат екі қолға бір күрек тауып отыр.
Еңлік Заманхан
