Шымкент аумағының ұлғайғандығына байланысты, қала құрамына енген кейбір мөлтек аудандарда әлі көше атауы жоқ болатын. Осыған байланысты, ағымдағы айдың алғашқы аптасында өткен Облыстық мәслихаттың әлеуметтік даму жөніндегі тұрақты комиссия отырысында атауы жоқ көшелердің мәселесі сөз болған. Басқосуда шаһардағы 3 ауданға қарасты шағынаудандардағы көшелерге жергілікті бюджет есебінен қаржы қаралып, Ұлы Отан соғысының ардагерлерінің есімі берілетін болып шешілсе, бүгін халық қалаулыларының көтерген сол мәселелері оң шешімін тапты. Яғни шаһардағы Қызылжар шағынауданындағы 1200 метрге созылып жатқан көше ендігі жерде Сейтжан Құртаевтың есімімен аталады.
Сейтжан Құртаев – есімі оңтүстікке етене таныс тұлға. Ұлы Отан соғысының ардагері, халық ағарту саласын дамытуда айырықша үлес қосқан Сейтжан Құртаев мектепте мұғалімдік қызметте жүре тұра, 1941 жылы майданға өзі сұранып аттанады. Неміс басқыншыларына қарсы тойтарыс берген сәттердің бірінде жарақат алып, 1943 жылы туған елге жаралы күйде оралады. Отанын жау қолынан азат еткен қаһарман ердің ерлігі бағаланып, 1946 жылы ҰОС ерең еңбегі үшін, 1971 жылы Ұлы Отан соғысында Германияны жеңгені үшін медальдарымен марапатталады. Өмірінің соңына дейін ұлағатты ұстаз — қызметті абыроймен атқарып, талай шәкіртті үлкен өмірге қадам бастырған білікті басшы болды. Білім саласында көптеген қызметтер атқара жүріп жас ұрпаққа жол көрсетіп, саналы тәрбие бере білді. Міне, осындай тау тұлғаның есімі Шымкенттегі Қызылжар шағынауданындағы көшелердің біріне берілген болса, сол көше бүгін ресми түрде ашылды. Ендігі жерде Ермат ата атындағы көшесімен қатар тұрған көше бүгінгі күннен бастап ардагердің есімімен аталады. Маңызды жиынның салтанатты түрде ашылуына ұстаздың өзінен тараған ұрпағы, Абай аудандық әкімдігінің өкілдері, көше тұрғындары, және шәкірттері арнайы келді. Құртаев Сейтжан 1912 жылы 20 мамырда Отырар ауданы, Шілік ауылында дүниеге келген. 1939 жылы Ташкенттегі Орта Азия универститетінің физика-математика факультетінің математика пәні мұғалімдік мамандығын алып шыққан жас өрен алғашқы еңбек жолын туған ауылында ұстаздық қызметінен бастады. Сол жылдары Хадиша анамызбен бас қосып 5 ұл, 6 қыздың әкесі атанды.
1200 метрді құрайтын бұл көшенің арнайы асфалт төселіп, абаттандыру секілді жұмыстарына ұлағатты ұстаздың ұрпақтары тікелей атсалысқан. Жалпы бұл Құртаев көшесі деп бейресми аталғанына 3-4 жылдың жүзі болған, дегенмен ресми түрде бұл мүдде енді орындалды. Айта кету керек, Сейтжан Құртаевтың жүріп өткен өмір жолы бүгінгі ұрпаққа өнеге. Өткенсіз болашақ жоқ, бүгінгі бейбіт күнді ұрпағына сыйлаған есіл ерлерге бұл келер ұрпақтың көрсетіп жатқан құрметі деп бағалаған жөн. Себебі, бабалар есімін ұлықтау ұрпақ парызы.
Ұлдархан Уәлиханқызы
