«Күлтөбенің басында күнде жиын». Бұл өткен шақтың еншісінде қалатын сөз емес. Бүгін де солай. Кешегі Күлтөбе, бүгінгі Түркістан қаласы облыс орталығы болғалы бері жиыннан кенде емеспіз. Әрине, алқалы жиын болмаса көпті толғандыратын келелі мәселелер ат үстінде шешіле салмасы анық.
Сонымен не керек, Түркістанда тағы бір алқалы жиын болып өтті. Нақтылап айтқанда, Халықаралық ғылыми-практикалық конференция. Тақырыбы: «Сотқа дейінгі іс жүргізу: шындығы және жетілдіру жолдары». Конференция бастамашысы, Қазақстан Республикасы Сыбайлас жемқорлыққа қарсы іс-қимыл Агенттігінің Түркістан облысы бойынша Департаменті. Ұйымдастырушылары: Түркістан облысының әкімдігі мен Қ.А.Ясауи атындағы Халықаралық Қазақ-Түрік университеті.
Конференцияда Қазақстан Республикасы Сыбайлас жемқорлыққа қарсы іс-қимыл Агенттігі төрағасының орынбасары Е.Шабдар, Түркістан облысы әкімінің орынбасары С.Қалқаманов, Ресейдің мемлекеттік Әділет университетінің Қылмыстық іс жүргізу құқығы кафедрасының доцеті А.Кравцова, Ташкент мемлекеттік университетінің доценті С.Муратаев, ҚР Президенті жанындағы Ұлттық қоғамдық кеңестің мүшесі, белгілі қорғаушы А.Омарова, Қ.А.Ясауи атындағы ХҚТУ-нің ректоры Б.Әбдірәсілов және тағы басқа бірқатар тұлғалар мен заң өкілдері келелі ойларын ортаға салды.
500-ден астам заң өкілдері бас қосқан халықаралық жиында Түркия, Ресей, Өзбекстаннан келген мамандар мен еліміздегі Жоғарғы Сот, Бас прокуратура, ІІМ-нің өкілдері өзара диалогтық алаң құрып, оң тәжірибелерімен бөлісті.
Жиын соңында «1424» көркем фильмі мен тақырыпқа сай сатиралық қойылым, жас суретшілер көрмесі көпшілік назарына ұсынылды.
«Халықаралық конференция адалдық атмосферасын қалыптастыруға жол ашпақ» дейді жиынды ұйымдастырушылар. Солай болса ,кәнеки.
Сейсенбай Ахмет, «Айғақ-Ақпарат».