Қала әкімі атаулы әлеуметтік көмек туралы біліп қайтты

Атаулы әлеуметтік көмек. Бұл дәл қазіргі уақытта аналардың әлегі болып тұр. Жағдайы төмен, отбасының табысы жетпейтін жандарға берілетін мемлекеттің жәрдемақысын алғысы келетіндер көп. Талайдың басын қатырған 21 мың теңге 2020 жылдан бастап өзгергенін білесіз бе?

Қазір жұмыспен қамту орталығының іші де, сырты да ығы-жығы болып жатыр. 1 қаңтардан бастап 4 баласы бар отбасыларға 42 500, 5 балаңыз болса – 53 125, 6 балаға – 63 750, 7 баласы бар отбасыға – 73 375 теңге көмек тағайындалды. Жаңартылған атаулы әлеуметттік көмекті алу үшін арлы-берлі ағылып жүрген аналар көп. Дәл қазіргі таңда ең күйіп тұрған тіршілікті байқап қайту мақсатында жұмыспен қамту орталығына бардық. Адамның көптігі сонша аяқ алып жүру мүмкін емес. Көпшілігі қандай құжаттың керек екенін әлі нақты білмейді де. Кейбір алтын құрсақты аналарымыз таң атпастан ашуға беріліп, ұрыс-керіс шығарып бірінің берекесін бірі кетіруде. Осындай дау-жанжалы бар ортаға бір кезде мегаполистің басшысы Ерлан Айтаханов кіріп келді. Сөйтсек, әкім жүйемен танысып, мәселеге өзі көз жеткізбек болған екен. Орынды. Халықтың ортасынан табылып, тіршілігін көзбен көргенге не жетсін.

Айтаханов ұзын-сонар кезектің ортасына кіріп кетіп аналардың өтінішіне құлақ түрді. Кеңес беретін, өтініш қабылдайтын нүктелер қажет-ақ екен. Осы мәселені білген әкім жұмыспен қамту орталығының мамандарына тапсырма жүктеді. Асыл жанды аналарға атаулы әлеуметтік көмекті түсіндіріп беретін орындарды көбейту керек екен.

Атаулы әлеуметтік көмекті алу үшін жеке куәлікпен барасыз. Және қай айдан бастап өтініш білдірсеңіз, сол сәттен бастап жәрдемақы тағайындалады. Бірақ, мемлекеттің беріп жатқан тегін ақшасына телміріп жүргендерге айтарымыз қаражат қолыңызға тиген соң, сізге табыс әкелетін кәсіпке жұмсауыңыз қажет. Еңбектеніп таппаған қаражаттың қадірі болмайды деген рас секілді. Өйткені, кейбір отбасы мемлекеттің ақшасын алып, оңды-солды жаратып жүр. Тіпті ұстағанның қолында, тістегеннің аузында кеткені де жасырын емес. Жәрдемақыны алу үшін мүлкін жасырып әлек болып жүргендер қанша ма десеңізші. Ол аз десеңіз ажырасуға дейін барады екен. Иә, «оңай жерде нан жоқ» деген нақыл сөз текке айтылмаған екен ғой.

Қаланың басшысы бұл күні көпбалалы аналардың ұсынысына құлақ түріп, атаулы әлеуметтік көмек туралы біраз мәліметті біліп қайтты. Ортасында мемлекеттің жәрдемақысын алып, кәсіп ашқандар да кезіктірді. Шын мұқтаждар шынын айтты.

Мемлекет басшысы көмекке шын мұқтаждар шетте қалмасын деді. Және жұмыс істегісі келмей жеңілдің астымен, ауырдың үстінде жүргісі келетіндерді анықтау керек деп тапсырған болатын. Содан бері атаулы әлеуметтік көмекке байланысты талап күшейді. Енді оңды-солды берілмейді. Сондықтан шын мұқтаждарға жол беріңіз…