Күллі Қазақстан халқының қуанышына айналған мемлекеттік мереке – Астана күні қашанда өрлік пен өрістеудің, жасампаздықтың символы болып қала бермек. Атаулы күнге орай, Шымкент қаласы әкімдігінің үлкен мәжіліс залында мерекелік шара ұйымдастырылды.
Шараға қала әкімі Ғабидолла Әбдірахымов қатысты. Алдымен, LED-экран арқылы журналист Ярослав Красиенконың «Мемлекет басшысы» атты деректі фильмі көпшіліктің назарына ұсынылды. Салтанатты шара барысында қала әкімі Ғ. Әбдірахымов қала тұрғындарын мерекемен құттықтады.
— Қазақстан халқы Астана күнін қуанышты жаңалықпен қарсы алғалы отыр. Орталық Азия аймағынан алғаш рет еліміз БҰҰ Қауіпсіздік Кеңесінің тұрақты емес мүшелігіне екі жылға сайлануы мемлекеттің мәртебесін тағы бір асқақтата түскендей. Сондай-ақ, мерейлі мереке қарсаңында Елорданың миллионыншы тұрғыны дүниеге келіп, ел қуанышын еселей түсті. Тәуелсіздік жылдарындағы қол жеткен айтулы жетістіктердің барлығы Елбасы Нұрсұлтан Әбішұлы Назарбаевтың елдегі бірлікті, әлемдегі қауіпсіздік пен бейбітшілікті сақтауға бағытталған сындарлы саясатының жемісі екені анық, — деп атап өтті Ғабидолла Рахматоллаұлы.
Салтанатты шара соңы жергілікті өнерпаздардың қатысуымен концерттік бағдарламамен жалғасты.
Шымкент қаласы әкімінің баспасөз қызметі
