ТІЛЕНШИН КӨШЕСІНДЕГІ ӨТКЕЛ АШЫЛДЫ

Тіленшин көшесіндегі жаңа автокөлік өткелі пайдалануға беріліп, алғашқы көлік қозғалысы басталды. Бұған дейін пойыздардың жиі жүруіне байланысты теміржол өткелі жабылып, бұл аумақта көлік кептелісі жиі орыналатын. Енді автомобиль мен теміржол қозғалысы бір-бірінен бөлініп, жүргізушілерге үздіксіз әрі қауіпсіз қатынауға мүмкіндік береді. Тіленшин көшесіндегі жаңа автокөлік өткелінің негізгі құрылысы өткен жылы басталған. Жоба Мемлекет басшысының Шымкенттің көлік инфрақұрылымын дамыту жөніндегі тапсырмаларын іске асыру аясында қолға алынған. Нысанның құрылысы теміржол желісінің үстінен жүргізіліп, көлік қозғалысына қолайлы жағдай жасауға бағытталды. Бүгінде өткел техникалық тұрғыда толық іске қосылып, көліктердің жүруіне жол ашылды. Ал нысан маңын абаттандыру жұмыстары кезең-кезеңімен жалғасады.Аталған теміржол учаскесі арқылы тәулігіне орта есеппен 59 пойыз өтеді. Бұған дейін пойыз қозғалысына байланысты өткел жабылып, көлік кептелісі мен жол жүру уақытының ұзаруына әсер еткені жасырын емес. Енді жаңа жол өткелі автомобиль қозғалысын теміржол қатынасынан бөліп, көліктің үздіксіз жүруін қамтамасыз етеді.

Жаңа өткелдің ашылуын қала тұрғындары мен көлік жүргізушілері ерекше қуанышпен қарсы алды. Алғашқы көліктер өткелмен жүріп өткенде жүргізушілер сигналдарын басып, ризашылықтарын білдірсе, тұрғындар шашу шашып, ақжолтай тілектерін жеткізді. Көлік жүргізушісінің айтуынша, жаңа жолмен бар болғаны 30 секундта жылдам өтуге болады, ал бұған дейін теміржол өткеліндегі кептеліске кемінде 30 минут уақыт жоғалтатынын ашық айтты. Тіленшин көшесіндегі жаңа автокөлік өткелі – Шымкентте биыл іске қосылған осындай екінші нысанның бірі. Ал жаңа өткелдің іске қосылуы қала тұрғындарының жол жүру уақытын қысқартып, көлік қатынасының сапасын жақсартуға мүмкіндік береді.