Алып қойманы алапат өрттен аман сақтап қалған азаматтар

24 маусым күні Арыс қаласында орын алған Төтенше жағдай салдарынан бұл аймақтың басым көпшілігі өртке оранды. Дәл сол жарылған снарядтардың бөлшектері «Арысшпалзауыты» ЖШС-де да келіп түскен.

Әуелі, іскерлік орталығын жалмаған тілсіз жау, мұнай қалдықтары сақталған қоймаға дейін келіп жеткен. Ең сорақысы, бұл қоймада 14 мың тонна көлемінде мұнай сақталады. Сондай-ақ, мұнай қалдықтарын тасымалдайтын 300 систерна қаз-қатар тұр. Егер, аталмыш зауыт директоры Абдулла Сүйінбаев дәл уақытында шара қолданбаса, бұл аймақта да алпауыт жарылыс болуы да мүмкін еді.

Оқиға былай өрбіген: мұндағы 4-5 қызметкерлер мен Абдулла Сүйінбаев бірлесе, алауды қоймаға дейін жеткізбей сөндіру үшін, 1 ғана өрт сөндіру көлігімен су тасыған екен. Оларды бір ғана ой мазалаған. Егер, лаулаған алау қойманы да шарпыса, онсыз да жұртты дүр сілкіндірген жарылысқа қосымша алпауыт өрт орын алар еді. Және оны сөндіруге ұзақ уақыт кетеді.

Сондықтан, өз басының қамын емес, Арыс өңіріне келген апатты сейілту үшін, күндізгі 17:00 шамасында басталған қызыл отпен күрес, түңгі 1:00-ге дейін жалғасқан. Абырой болғанда, отты дәл уақытында тоқтатыпты. Егер оқиға орынын көзбен көрсеңіз, сіздің де денеңіз тітіркенеді. Өйткені, мұнай сақталған қоймаға өрт 4-5 метрге дейін жақындаған. Ойлауға да үрейленесіз. Осындағы қызметкерлер қара басын ойлап, эвакуациямен нысанды тәрк еткенде, не болары бір Аллаға аян! Бірақ, мұндағы басшылық пен қызметкерлер қолдарын келгендерін аямады. Дегенмен, жарылыс салдарынан «Арысшпалзауытының» қоймасына келген шығын аз емес. Сондықтан, бұл қойманың қазіргі жай-күйімен Түркістан облыстық мәслихатының хатшысы Қайрат Балабиев пен халық қалаулысы Дулат Әбіш танысып қайтты. Оқиға орнына барып, «Айғақ» телеарнасына арнайы сұхбат берген Қайрат Балабиев, кәсіпкерлерге көрсетілетін қолдау мен көмек жөнінде айтып өтті. Өздеріңізге мәлім, арыстық ағайынға қолдау көрсету үшін, оқиға орнында Түркістан облысының әкімінен бастап, халық қалаулылары да жүр. «Ал мұндай ірі кәсіпорындарға келген шығындарды, қайта қалпына келтіру үшін көмектесеміз»- дейді халық қалаулысы. Әрине, мұндай төтенше жағдайда ең әуелі, қолдау аса маңызды. 1 ай көлемінде Арыс қаласы қайта қалпына келтірілуге дәл қазіргі сәтте барлығы жұмыла жұмыс жасауда.

«Айғақ-Ақпарат»