Асқар Мамин Арыс қаласының бүгінгі ахуалымен танысып, нақты тапсырмалар берді

ҚР Премьер-Министрі Асқар Мамин бастаған бірқатар үкімет мүшелері бүгін арнайы жұмыс сапарымен Арыс қаласына келді.

Еске сала кетсек 24 маусымда орын алған апат кезінде Арыс қаласындағы тұрғын үйлер мен əлеуметтік нысандардың 80-85 пайызға жуығы айтарлықтай зардап шеккен болатын. Ал жарылысқа байланысты эвакуацияланған тұрғындар кеше өз шаңырақтарына оралды. Ал ендігі жерде күн тəртібінде тұрған басты мəселе қысқа уақыт ішінде Арыс қаласын қайта қалпына келтіру болып тұр.

Осыған орай үкімет басшысы Арыс қаласына жасаған жұмыс сапарын алдымен «Көктем» шағын ауданынан бастады. Аталмыш елді мекен апат кезінде ең ауыр зардап шеккен мөлтек аудандардың бірі. Себебі, мұндағы нысандардың басым бөлігі бүлініп негізінен шатырлар бұзылып терезелері шағылған.

Солардың бірі И. Журба атындағы жалпы орта мектебі. Білім мекемесінің апаттан кейінгі ахуалымен танысқан Асқар Мамин қаланы 1 ай мерзім ішінде қайта қалпына келтіру бойынша нақты тапсырмалар жүктеді.

Бұл тұрғыда Арыстағы құрылыс жұмыстарына бірқатар облыстар да үлестерін қоспақ. Мəселен Павлодар облысы осы аумақтағы 300 ден астам тұрғын үйлер мен əлеуметтік нысандарды жөндеуден өткізуді жүзеге асыратын болады. Оның ішінде 5 көпқабатты тұрғын үйлер де бар. Сондықтан Павлодар облысының жұмысшы бригадалары іске кірісуге дайын. Ол үшін қазіргі таңда тұрғындармен кездесіп түсіндіру шаралары жүргізіліп жатса, құрылыс жобасына жұмсалатын қаржы мөлшері де есептелу үстінде.

Бұл туралы облыс əкімі Болат Бақауов мəлімдеді. Ал əзірге жергілікті тұрғындар баспаналарын сынған заттардан тазалау жұмыстарына қызу кірісіп кеткен.

«Айғақ-Ақпарат»